Kahrupesä noorõ pedäjä all

Löüdse 6. radokuu pääväl kahrujälgi piten minnen unõst heränü kahru pesä. Arvada olli mõtsamassina tä unõst üles herätänü.

Noorõl pensionäril õkva trehväs! Panni ma, tõist päivä pensionär, üle aastidõ suusa ala, et minnä uma soepiniga mõtsa suusatama.

Üüse oll’ tsipa lummõ sadanu ja kõik jäle väega värski. Panni tähele, et mu mõtsast tulõva suurõ eläjäjäle. Ligembäle suusatadõn näi, et nuu omma kahrujäle. Mõtli, et radokuu 6. päiv om kahru heränemises viil tsipa varra.

Mobiili üten es olõ, fotoaparaati es olõ, pilti tetä es saa. Suusati kodo, võti fotoka ja vahtsõst tagasi jälgi mano.

Tei pildi är ja mõtli, et pesä tulõ kah üles otsi. Äkki om imäkahr puja maaha jätnü. Kombõrdi vahtsõst kodo, panni suusa ala ja otsma.

Päält pikkä otsmist löüdse pesä kah. Arvada või, et tego oll’ noorõ, kolmõ–nelä-aastadsõ esäkahruga, selle et jäle olli umbõs 14 sendimiitret lagja. Kahr oll’ kraapnu üte väiku pedäjä ala nõlva sisse tsõõriku mulgu, voodõrdanu tuu mõnõ kuusõossaga ja oll’gi kõik. Väega lihtsä pesäkene.

Arvada või, et kahr tull’ üles tuuperäst, et naabri mõtsan tetti harvesteriga mõtsaragomist. Ku pall’o mõtsaragominõ egä talv kahrõ üles aja, ei tiiä kiäki. Mõtsamiis ei pruugi ülepää nätä, et kahr üles kargas. Ja ku samal aol satas lummõ, olõ-i poolõ tunni peräst jälgegi alalõ.

Kahr võidas üles aia jahi aigu kah, a sis inämbäste nätäs tä är ja kaias pesä üle.

Esäkahru ülesheränemine ei olõ väega hull asi, kül tä lätt viil vahtsõhe paika magama. A keväjä tulõ sääne kahr muidoki egäl juhul varõmp üles. Ja ku tä süvvä ei lövvä, om asi hapu. Sis lätt tä kas mehiläisi mano vai pruuv mõnõ eläjä murda. Hää om, ku löüd mõnõ lõpnu tsia, kitsõ vai põdra, sis vinütäs keväjäni vällä.

Rohu Urmas

Seo pildi pääl lätt peremiis pinikutsikat pauguga har’otama. Nüüt om kutsikust kasunu joba poolõtõsõ-aastanõ illos pini. Pilt Rohu Urmasõ eräkogost.