Mõni aig tagasi avast’ üts Leevi inemine, et lauda saina vasta oll’ tuulõ kaitsõs pantu umaaignõ vineerist plakat. Avastajat köütse sääl pääl Lenini pilt. Mis tah sis viil om, tahtsõ tä tiidä ja ai prahi lakja. Oh imeht, määne rariteet säält nättäväle tull’ – valgõ alusõ pääl musta värmi Lenini pää ja kõrvalõ suuri sinitside trükitähtiga kirotõt: «Lenini mõtetes tunda võib elava rahva nägu.» Kõrrapäält tekk’ tä plakatist pildi ja pand’ tuu FB-hte üles.
FB-st ma kah taad ilmaimeht uma silmäga näi ja sis tull’ kõrrapäält miilde, kuimuudu plakat tõtõstõ korgidõ postõ küleh sovhoosi Leevi osakunna kontori iih aastakümnit avalikult rippu, ilma et kiäki är olõs kiildnü. Käve esi kah säält mitu kõrda müüdä, ku sovhoosimajah postkontorih käve. Esieränis om meeleh tuu, kuimuudu mõsunüür oll’ vinnatu plakati üte posti ja puiõ vaihõlõ ni naisi ihomõsu lehvü uhkõlõ tuulõ käeh, tagapõh’a pääl Lenin uma väärt mõttõga.
Mälehtä, et jäi viil saisma ja mõtli, kuis taad niimuudu külh lubatas. Kõnõli viil mõnõlõ tõõsõlõ kah tuud ands’akat asja. Rehmäti käega, et kelle asi. Äkki es julõta vai es taheta taad teemat üles võtta?
Parhilla as’a pääle perrä mõtõldõh muidogi om pall’o asjo, midä teedä tahassi, a vastajit inämp olõ-õi. Kuimuudu sovhoosi partorg ja tõõsõ padukommunisti säändse as’a läbi lasi? Kes säändse plakati ülepää vällä mõtõl’ ja kes tegi? Kas tetti meelega sääne plakat?
Ku ma tahtsõ umalõ väikulõ latsõlõ laskõ kuta Võrol mustõ pingviine ja sinitside lumõkibõnidõga valgõt mütsü, ülti, et naa värmi ei olõ lubatu, ja lumõkibõna jäeti är, et keeletü värmikombinatsiuun. Olõ kuulnu, et keskkooli lõpusõrmusõlõ es lubata sinimustvalgõt värvi kõrvuisi. Ja siin – määne plakat! Kuigimuudu ei tahassi usku, et vanõmba inemise es näe ja es saa arvu – tuu ei olõ mu parhilladsõ arvusaamisõ perrä võimalik. Noorõmbist om viil arvu saia. Määnestki juttu külä pääl taast plakatist ei mälehtä.
Ku parhilla taad plakatit kaia ja mõtõlda, sis võit vällä lukõ, et periselt olõ-õs Lenini mõttil vai sis raamatil rahvaga midägi ütist, oll’ õnnõ ilmadu suur üleskitmine. Elävä rahva nägo oll’ käkit hoobis plakati värme sisse. Tuuh mõttõh oll’ plakat tollõl aol mi täämbädse päävä avalik prohvetlik ettekuulutus.
Liiva Aasa
Reimanni Hildegardi tsehkendüs
