Neo priinime omma piiblist. Meesakil (77 kandjat) om mitmit tõisigi kiräpilte: Mäsak (57 kandjat), Mesak (10 kandjat), Mässak (alla 6 kandja). Lisas om viil eestistämisel võet vahtsõ tähendusega Meesaak (6 kandjat).
Seo nimi panti just piiblist tunnõtu nime perrä kolmõn mõisan. Sangastõ mõisan sai nime Lõõndre Lut’a (Lutta) perekund. Lut’a edenimi om mugandus Ludvigist. Näide nimme kirutõdi edimält personaalraamadun Mesak. 1826. aastaga hingelugõmisõ aos oll’ Lut’a joba koolnu, timä naanõ Tiiu ja kolm poiga ellivä Sangaste külä Laosse-Andruse talun, nimi oll’ kirutõt Mäsak. Sangaste suguvõsa inemisi nimme om harva kirutõt ka Mässak. Hingelugõmiisi perrä panti Mässak ka Vana-Suistle mõisan Tarvastun, a sääl olõ-i selge, kas mõtõldi iks piiblinimme vai midägi muud.
Tõnõ piiblinime algkodu om Järvämaa Türi-Alliku mõisa Retla külä, kon panti Mäsak. Nime saanuid perrit oll’ tan joba algusõn mitu, nii et nüüdki om nii Mäsakit ku Meesakit Järvämaal hulga.
Kolmas kotus oll’ Virumaa Ereda mõisa, kon panti Mesak. Nii Ereda ku Türi-Alliku suguvõsan nakas’ piä levima ka vahtsõn kiräviien nimekuju Meesak.
Eestistämisel nimme Mäsak muudõti, võttõn asõmalõ Meesaak, Maaste, Mere ja Merila, kõik Türi lähkün. Lisas võeti Mäesalu, Meristu ja Männi.
Nimi Sadrak (37 kandjat) om rohkõmb Lõuna-Eesti nimi. Seod panti niisamatõ Sangastõ mõisan ja lisas viil Aagre mõisan Rõngu kihlkunnan, kon kirotõdi edimält Sadrag. Kolmas kotus oll’ Mündi mõisa Paide kihlkunnan. Sadraku eestistämisel om asõmalõ võet Ladva, Ojalepp, Saarmets, Saluri ja Senno.
Piiblin om Taanieli raamat. Taaniel, Hananja, Miisale ja Asarja olli juuda poisi, kedä kasvatõdi Paabeli kuninga Nebukadnetsari man. Näile panti ka tõsõ nime: Beltsassar, Sadrak, Meesak ja Abednego. Nime omma peri kaldea keelest. Sadrak om seletet ku ’(kuujumala) Aku käsk’, a seod nimme om peet ka moonutusõs jumalanimest Marduk. Meesaki nime kõgõ levinümb seletüs om kah kuujummal Aku kaudu, umbõs ’kiä om nigu Aku’. A om tõisigi selletüisi, näütüses himu jumalanna Sakh nime kaudu.
Piibli lugu kolmõst kimmä usuga mehest, kiä jäivä ellu esiki kuumas kütetün ahun, om Sadraku ja Meesaki nime tuntus tennü. Ka kolmanda mehe nimme panti priinimes kujul Abetnego ja Abenecko.
Saarõ Evar
Rubriigin kõnõldas perekunnanimmi periolõmisõst ja tähendüsest.
