Suvitsõl aol ringi roitõn või trehvädä põnõvidõ paiklikkõ süüke pääle. Seol suvõl kävemi Saksamaal Lübecki liinan, kon vana raekua takast turuplatsi päält sai osta heeringäburgõrit – saia vaihõlõ pantut heeringät sibula ja saladilehega, midä peetäs klassikalidsõs mereviirses haugahusõs. Burgõrit oll’ katõsugumadsõ heeringäga – üts oll’ nahaga ja tõnõ nahalda. Müüjä kitse, et tälle miildüs nahalda heering inämb ja nii ostimi mi kah tuud. Maik oll’ tuul nigu iks heeringäl, makõ es olõ, a saia asõmõlõ olõssi tahtnu külh musta leibä võiuga.

Üts tutva, kiä om elänü tõsõn Läänemere-viirsen Saksamaa liinan Greifswaldin, kõnõl’, et säält saa osta heeringäkukliid mitmõ esi sahvtiga. Kõgõ populaarsõmb pidi olõma ploomimoosiga heeringäkukli. Õkva tuud ollõv söönü ka Merkeli Angela, ku tä käve sääl liinan külän.

Ku Prantsusõ president Macroni Emmanuel käve üten Saksa kantslõri Scholziga Hamburgin, seivä nä heeringäsaia pressikonvõrõndsil.

2011. aastagast pääle peetäs mereviirsin piirkundõn Schleswig-Holsteinin ja Mecklenburg-Vorpommernin lehekuu edimädsel puulpääväl üleilmalist kalasaiapäivä.

Fastrõ Mariko

Heeringäburgõr. Fastrõ Mariko pilt