10. põimukuu pääväl saadi Kaika suvõülikooli matkapääväl kokko Ihamaru külämajan, kon tinavaastasõ rektriraha sai kaala Rohu Urmas, kiä om kotusõpääline miis ja ammõdi poolõst dendroloog vai puu-uurja.

Matkapäävä sissejuhatusõs pidi Saarõ Hipp lühkü ettekandõ Postitii ni muistsidõ teie aoluust Ihamaru kandin.

Sis minti edesi kaema talokotussit, kost omma peri tuu nuka kuulsa mehe Rohu Richard ni Marki Heinrich ja Aksel.

Peräst tuud kääneti tii päält är peris mõtsa vaihõlõ, kon Rohu Urma juhendamisõ perrä otsiti üles Korveläte Hilba jõõ veeren arvada väega vana liikmistii kõrval.

Sõs näüdäs’ Urmas umahindä tiidüsliidsi projekte. Tä om uma väiku Palojärve viirde mõtsa ala kasuma säädnü pia 100 sorti rododendronit ni hortensiat, kellele miildüs hapu muld. Viil om tä tennü roosiaia 100 sordi ruusõga, mõtsa kõosortõ kogunu ni tulbisibulit kasuma säädnü, a toda kõkkõ lubasi tä inemiisile näütämä naada viil mõnõ aastaga peräst, ku kitsõ inämb kasvõlõ hätä ei tii.

Päält tsukõlust Palojärven ja lühküt lõunat minti edesi Karilatsi muusõumi poolõ, kon Raju Eliisabet üten Misnigu Rikoga võti väsünü matkalidsõ vasta. Näide abiga opiti selges mõni rahvalik tands. Kokko käüti maaha 14 kilomiitret.

Matkapäävä kõrrald’ Võro selts VKKF ja seokõrd pand’ plaani kokko noorõmb põlvkund – Rahmani Elo ja Raju Eliisabet.

UL

Matkapäävälidse Alamusti kandin Põdrakivi man. Valpri Valdo pilt