Põimukuu edimäidsil päivil suurõ vihmasao aol võisõ Liinamäel Urvastõ kihlkunnan nätä esierälist pilti, ku üts must toonõkurg oll’ üten hulga valgidõ toonõkurgiga nurmõ pääl süvvä otsman.
Arvada oll’ tegemist noorõ tsirguga, selle et timä nokk ja jala es olõ viil nii verevä ku vanul tsirgõl. Ka rõngast es olõ täl jala küllen.
Must toonõkurg om Eestin küländ harv tsirk ja tä om kaitsõ all. Tä eläs vanan mõtsan, sakõstõ mõnõ lumbi vai suu lähkül. Süvvä otsma lindas tä 5–10 km kavvõdustõ pesäst ja päämädselt süü tä kalla. Sõski om tedä ka innembi nättü nurmi päält süvvä otsman. Arvatas, et inemise lähkül tälle ellä ei miildü. Ku tä sõski vanal aol trehväs’ inemiisi lähküle, usuti õkva, et tä tuu midägi kurja kaala. Säält om tä ka nime saanu – must toonõla tsirk.
Fastrõ Mariko
Fastrõ Mariko pilt
