Määndse olli mi kandi rahva meelelahutustegemise minevä aastasaa alostusõn? Toolõ küsümüsele and vastussõ Karilatsi muusõumin vallalõ tettü huuaonäütüs «Külä laul ja häll lindas».
Karilatsi muusõumi koolitarõ ederuumin omma üles säedü pildi ja as’a, miä köüdedü Vana-Võromaa maarahva vaba ao viitmisega 19.–20. aastasaa vaihtusõl. «Es olõ vanastõ kah õnnõ tüü- ja kodoelo, iks otsiti meelelahutust, et hinnäst tüüst vällä lülitä. Sis es olõ telekat ja internetti nigu täämbädsel aol ja inemise saiva rohkõmb ütstõõsõga kokko. Tan omma tuudu vällä as’a, miä paksõva 100 ja 150 aastakka tagasi inemiisile lõbutsõmisõ võimalust,» seletäs muusõumipedagoog Luude Marge.
Maarahva hariligu kokkosaamisõpaiga olli umal aol kõrdsi, hällü- vai tsõõriplatsi ja laaduplatsi. Inemise saiva kokko viil egäsugumaidsin seltsen, olkõ tuu sis rahvaharidusõ- vai näütemänguselts vai puhkpilliorkestri. Üts kimmäs kokkosaamisõ kotus oll’ talos. Sääl köüdeti kokko tüü ja lõbu: kõgõpäält tetti ütenkuun suurõmb tüü är ja päält tuud naati pito pidämä. Luude Marge jutu perrä oll’ vanastõ inämbüs kokkosaamisõ aigõ köüdet rahvakallendri tähtpäiviga ja päält lihtsä meelelahutusõ saiva noorõ pido aigu umavaihõl tutvas. Säändsil kokkosaamiisil tetti kombõtäütmiisi kah, näütüses hällüti, et saia parõmbat viläsaaki.
Suuri fotopilte kõrval om näütüsele vällä pantu asju, miä pidoteemaga köüdedü. Tõisi hulgan saa nätä Kungla puhkpilliorkestri ligi 100 aastakka vannu pille. Laadapildi mano om vällä pant rändkaupmehe kohvri kõgõ uma kirivä sisuga.
Lisas om näütüsel viil üts nukakõnõ, kon saa nätä puskariajamisõs tarviliidsi asju. Vällä omma pantu puskariaparaatõ osa ja kihä ümbre käüvä karrakõsõ, minka salaviina veeti. Näütüse seletävä teksti perrä om kangõ alkohol iks maarahva kokkosaamiisi mano käünü. Ku inne 1900. aastat aeti viina inämbüisi mõisa viinaköögin, sis päält riikligu alkoholimonopoli päälepandmist ja ildamba edimädse ilmasõa aigu alkoholi müümise ärkiildmist sai salahanõ puskariajaminõ mi kandin kõva huu sisse.
Rahmani Jan
Karilatsi muusõumipedagoog Luude Marge huuaonäütüst näütämän. Rahmani Jani pilt
