Paprõvõimu vasta
Ma kuuli raadiost, et riik nakkas paprõvõimu vasta säädüisi muutma. Joba om tettü ümbre, et suidsuruumi silt piä ei olõma kimmäst mõõti ja redelit piä ei nii sakõhe üle kontrollma.
A kuulõ jaos tetäs säändsit peenükeisi nõudmiisi hoobis mano. Ku koroona-aigu panti klassõhe aparaadi, mis mõõtva hüdsihappagaasi õhuh, sõs nüüd piät nakkama mõõtma, ku kipõstõ kooliklassõh õhk liigus. Ja maalatsõ ei toheki inämb jalaga kuuli minnä, selle et maal olõ-i suurõtii viirde jalgtiid ehitet. Tarto liinah tetäs botaanigaaida latsiaialatsi jaos mudarada, koh latsõ saava kivve pite ronni, maad patsuta ja inämb luudusõga kokko puttu. A koolimaja ümbre kästäs hain nii lühküs niitä, et latsil jala kinni ei jäässi. Kuimuudu nuu koolilatsõ sõs äkki nii nõdras jääse? Kas tõtõstõ terve mudso paprõvõimu vasta saa-i?
