Nimme Tuuksam kand Eestin 49 inemist. Priinime vanan kiräviien kujju Tuksam kand katõssa inemist. Panti taa õnnõ Mulgimaal Tarvastu mõisan. Nime saajas oll’ küländ suur suguvõsa täämbädse Mustla alõvi ümbre, näütüses Riibu Jaagu poja, Miku-Piitre Aadu poja, Tõlva (Telve) Andrese poja ja latsõlatsõ ummi perridega.
Nime kiräpiltega om nii, et hingelugõmistõ 1826 panti kirja kõikilõ üttemuudu Tuksan. Kerikligult läts’ asi segätsembäs. Tarvastu personaalraamatun 1833–1856 om hulgal perril kirja pantu Tuksam, miä om kas maha tõmmatu vai ümbre soditu nimes Tukson, ütel juhtumisõl ka nii nigu hingelugõmisõn: Tuksan. Illatsõmban personaalraamatun om joba Tukson ja Tuksam registrin erälde nimmis arvat.
Ku tull’ vahtsõnõ kiräviis, naati nimme kirutama Tuuksam. Tuu tähendäs, et u oll’ joba ka inne pikk. Huvitav om üte asundustalu nimi Riibu külän: Tuuksama. Kuigi nimi om tegünü 1920. aastil, või arvada, et sõs viil tiieti, kuis seod priinimme vanast kääneti.
Marja Kallasmaa om Eesti perekonnanimeraamadu käsikirän seost nimest kirutanu. Tä om säädnü võrdlusõs kõrvalõ Põltsamaal Lustivere mõisan pantu nime Tüksammel (26 kandjat). Tuud nimme om kirutõt ka lühkü m-iga. Tuul juhtumisõl tulõtas Lustivere nime lõpp miilde edenimme Saamel ~ Samuel. Viil om tä löüdnü kõrvutusõs poolaperädse vana mehenime Tuczan, miä sobis parõmbalõ hingelugõmisõ kiräpildiga Tuksan. Tuu nimi om 1599 kirja pant Rēzekne kandin Lubānan. Tuczani naabri sääl külän omma nimmi perrä otsustõn iks latgali. Kõrvutusõ seto ja võro sõnnuga tuksa ‚tukõv, jovvulinõ’, tuksamb ‚tugõvamb‘ olõssi kah hää, ku u olõssi olnu lühkene.
Kõgõ parõmb võrdlus om Kallasmaal lövvet Haanist, 1638 Tuksa Pep Tilga-Tsiamäe kandist. Paku vällä, et kadunu *Tuuksa-lisanimi Haanin, külänimen alalõ püsünü Tuuka-lisanimi säälsaman ja mitmasugumadsõ tuksi– ja tuksu-nime üle Eesti võissi kokku kuuluda. Takan om skandinaavia mehenimi Toke [tuuke], umastavan käänüssen Tokes, ka kujul Tyke, Tuko. A –m nimen Tuuksam võissi olla hoobis *Tuuksa maa lühendüs.
Saarõ Evar
Rubriigin kõnõldas perekunnanimmi periolõmisõst ja tähendüsest.
