9. põimukuul tähüstedäs Kanepi kihlkunna 350. aastapäivä.
Pääle naatas kell 10, ku puhkpilliorkestri Kungla tege keriguaian herätüsmängu. Samal aol tetäs raamadukogon vallalõ kihlkunna aastapääväle pühendet näütüs, midä saa kaema minnä kooni kellä 14ni. Kell 11 pidä vallavanõmb päävä avakõnnõ ja alõvi pääl tetäs valla kohvigu ja paiga, kon saa kõgõ perrega midägi ette võtta.
Kell 11.30 peetäs maaha jutuajaminõ «Kuis edesi, Kanepi?». Tuu om Kanepi tegüside nuuri iistvõtminõ ja mõttit omma vaihtama oodõdu kõik, kinkalõ om tähtsä kodokandi tulõvik.
Kellä 12–15 näüdätäs Kanepi seldsimaja saalin kinno. Kaia saa Vidilä Vaidu (1949–2017) üles võetuid Kanepiga köüdetüid filme. Samal aol om seldsimajan piili pääl kudajidõ huvitsõõri vaipu näütüs ja koetas ka kihlkunnapäävä vaipa.
Kell 12.30 tetäs vallalõ tüütarõ Kanepi keskusõ pargin. Meisterdedäs puppõ ja prossõ ja ilostõdas kündletopsõ.
Kell 15 saa kerikun kullõlda Kanepi segäkoori kontsõrti. Kell 17 astus keskusõ pargin üles tandsurühm Päripidi. Kell 19 and kerikun kontsõrdi Tartu Arsisõ kelli ansambli.
Päävä lõpõtas Tauli Anu, kiä ast üten sõpruga kell 21 üles Kanepi keskusõ pargin. Kell 22 saa säälsaman nätä Artistic Flow LED-sõud.
Kihlkunnapäävä tegemise omma ossavõtjilõ massulda, päivä tugõva Kanepi vald ja Eesti Kultuurkapital.
UL
