Seol nimel om Eestin 76 kandjat. Priinimi panti õnnõ üten kotussõn: Rõugõ kihlkunna Haani mõisan, tuuaolidsõn Avi (Awwi) külän, minkast saigi varsti pääle tuud Troll’a külä. Täämbä om Abikülä kah olõman, a om hoobis üts Troll’a külä veerekene. Troll’a nimen om pehme -l, miä hariligust kiräpildist vällä ei paistu.
Nime saajidõ tsõõr om 1826. aastaga hingelugõmisõn kirän Avi külä all. Keriklikult om asi hulga kirivämb. Ütele väümehele, Kaloga Miku Tanilalõ om personaalraamatun 1796–1830 pant nimes Rattassepp, a hingelugõmisõn panti tä perrele naasõ, Avi Jakapi tütre Katri suguvõsaga sama nimi Trolla. Tõsõ nime saanu perre vanas imändäs oll’ tõist kõrda abiellunu Made, Troll’a Peebu läsk. Siist tulõ õkva vällä, et Troll’a oll’ lisanimi ka inne priinimmi pandmist: Avi Peep = Troll’a Peep. A priinime Trolla sai ka Made tõnõ miis Kallassõ Jakap ja timä latsõ. Kolmas nime saaja oll’ Avi Miku Toomas uma perrega. Omma viil kats miist, Mäe-Tilga Ado poja Piitre ja Jaan, kinkalõ personaalraamatun 1796–1830 näüdätäs nimme Kuldsep, a 1831–1884 om tett muutus nimes Trolla. Noist vellist Piitrel peret olõ-es, a Jaanil oll’ naasõs Avi Peebu (Troll’a Peebu) poja Avi Jaani tütär Mari. Nii mitu priinime saamisõ seost naisi kaudu om peris harv juhtuminõ.
Troll’a priinime saajidõ sugulusõ tsõõr olõki-ei peris selge, a tuumikus omma kolm 18. aastagasaa kesken sündünüt velle, Avi Hindu poja Jakap, Peep ja Mikk. Kas näid kutsuti ka Troll’adõs? Peebu kottalõ om tuu mustvalgõl kirän (kae üllenpuul). A Avi Hindu noorõmba poja Miku ristmisel 1753 om hoobis ütes vadõris olnu Trolla Jürri.
Rahvaperimüsen om teedüs, et om elänü Rulli-nimeline miis, kiä ehit’ edimädse veski parlatsõn Troll’a külän. Revisjonin ja vakuraamatun 1758 Avi külä peremiihhi hulgan üttegi Jürri kirän ei olõ, Abbi Hint om külh. Veski om kirän ku Awische Mühle, mõisa valdusõn. Seo kõgõ perrä paistus, et Troll’a nimi om kõgõ varahampa käünü Avi Hindu perrest erälde, a 18. aastagasaa lõpun nakanu iks näide hõimu tähistämä ku tõnõ lisanimi.
Minkast Troll’a nimi tulõ? Olõ paknu, et Pihkvamaa vinne sõnast дроля ’armukõnõ, kallikõnõ, silmärõõm (meesterahvas, mitte naanõ)’. Ka mi uma sõna trull (eesti keelen rull) ja eriti hellitüsvorm trull’a või nime alussõs olla.
Ku nimmi eestistedi, sõs Troll’a Oravil võti vahtsõs nimes Rajangu. Misson võeti Lehis ja siseministri man Laasik.
Saarõ Evar
Rubriigin kõnõldas perekunnanimmi periolõmisõst ja tähendüsest.
