Iispäävä tull’ kuuli folklooriansambli Käokiräs, kuun 1.–5. klassi latsiga laulõti ja tandsiti. Tõõsõpäävä panti tiidmise proovilõ võrokiilse Kuldvillakuga. Kolmapäävä oll’ Kääpa majan külän Saarõ Hipp, kiä tsihis om võro keele edendämine ja nuuri sekkä viimine.
Edimält kõnõl’ Hipp hindäst, a sis näüdäs’, määndsit ütismeediä-kotussit tä tarvitas, et noidõ kaudu võro kiilt inemiisile lähembäle tuvva. Viil kõnõl’ Hipp võro keele tähtsüsest ja võro keelest ku mi kultuuriperändist. Päävä lõpun tetti 7.–9. klassi latsiga uma klassi kamban lühkese video, sääl kõnõldi õnnõ võro kiilt.
Neläpäävä and’ kontsõrdi Ilvese Aapo, kiä laulsõ ja mängse kitrat ni vahepääle kõnõl’ nal’aliidsi juttõ võro keelen. Samal pääväl võti 1.–4. klassi opilasõ ossa pall’o huvvi tekütänüst võrokiilside lugudõ lugõmisõ võistlusõst.
Nätäl lõpõtõdi huuga: kuun oppaja Aivaga lüüdi tandsu. Muidogi olli tandsuluu võro keelen. Orava majan peeti aardõjahti ja mängiti üten latsiaialatsiga laulumänge.
Võro keele nädäli tähüstämine Kääpä koolin näüdäs’, et võro kiil eläs tävve huuga ja kõlas imehäste.
Mihkelsoni Elen
Folklooriansambli Käokiräs. Mihkelsoni Eleni pilt
