Joba kuu aigu om Vahtsõn-Roosan Mõtsavele talo poodi iin saisnu müügimassin, kost huvilidsõ saava üüpäiv läbi juustu, sõira ja muud talokraami osta. Talo perremehe Mõttusõ Meelise sõnno perrä om massin mi talvõn häste vasta pidänü ja ostja omma massina umas võtnu.
«Periselt om seo mõtõ peris vana ja mi olõmi noid massinit otsnu joba ennemb kah, käünü kaeman ja hindu küsünü. A varõmb es lövvä säänest massinat, mille võitki õkva vällä panda ja midägi ümbre ehitämä ei piä,» seletäs Mõttusõ Meelis. Massina löüdse Mõtsavele talo rahvas Tal’na söögimessilt, kon Poola firma müügiesindäjä Svetlana näide juustu maitsma tull’ ja umma massinat näütämä naas’.
Edimält om massin võet proovis, et kas tä tõtõstõ pidä mi ilma käen vasta ja tüütäs kõrraligult. «Tehas om lubanu, et ku vällän om 60 kraati lämmind vai 25 kraati külmä, sis massin tüütäs ja hoit seen säänest temperatuuri, nigu ette annat. Meil om tuu viis kraati. Kõgõ külmemb om seo ao seen olnu –19 kraati, sis kül massin tüüt’. Tuul om tsipakõsõ liiga tennü, päälekleebitüid reklaamõ maaha puhknu, a tehnilist hätä ei olõ olnu,» seletäs Mõttusõ Meelis.
Parhilla om massin säetü niimuudu, et massa saa õnnõ kaardiga. «Tulõt massina manu, ja ku viis eurot om pangakonto pääl, sis saat osta. Om lihtsä menüü, vaotat «Sirvi menüüd», tulõva pildikese ette. Valit uma kauba vällä, vaotat, et massat kaardiga ja sis om piiks-piiks, raha lännü, ja tulõ üts uss vallalõ ja tõnõ uss vallalõ, kon valit kaup om. Saat uma sõiratükü kätte ja omgi,» kõnõlõs Mõttus.
Parhilla saat massinast viieeurotsidõ portsõna osta esi sortõ juustõ, sõiru ja kohopiimäjuustõ, a plaanin om massinast kolmõ pudõli kaupa keefirit kah müümä naada. «Olõmi umbõs 100 tükükeist möönü. Kõgõ rohkõmb 19 tükkü päävän, kõgõ veidemb om null olnu,» võtt Mõttus edimädse müügikuu kokko. Nii mõnõgi ostja käest om Mõtsavele talo rahvas kittä kah saanu, et om sääne võimalus tegünü.
Rahvas ründäs kelgumäke
Talvitsõl aol om Mõtsavele talo man nädälivaihtusõl kelgumägi kah vallalõ. Timahavanõ aastak alost’ kelgumäe pääl suurõ murdõlõmisõga. «Kelgumägi om superluks!» kitt Mõttusõ Meelis. «Aasta alas’ õkva marulidsõlt, neli päivä üttejärge oll’ kelgumägi vallalõ. Autu es mahu parklalõ är, mi tõuksimi lisaparkla, sääl oll’ kah 14 autut. Ja sis kõik nuu tuubi, mis olli joba vanõmba, sai kah täüs pumbatus. Kelkõ viil olõs jakkunu, a inämbüs taht tuubiga sõita. Ja nõstuki järekõrd oll’ ka sama pikk nigu nõstuk esi,» seletäs tä.
Et Mõtsavele talo om küländ Läti piiri veeren, sis käü nii müügimassina man ku kelgumäe pääl rahvast säält kah. Mõttus hindas, et huvilidsõ omma umbõs poolõs, poolõ Eestist ja tõnõ puul Lätist.
Mõtsavele talo perremiis Mõttusõ Meelis müügimassina kõrval. Rahmani Jani pilt
