Ansamblil Unised Uitajad, kon mängvä-laulva Eliste Annika ja Kaupo, om valmis saanu vahtsõnõ võrokeeline laul «Süä tsälkä». Luu tege esierälidses tuu, et külälissolistin ast üles Kuuba Rainer. No vastas Rainer paarilõ Uma Lehe küsümüsele.
Kuis juhtu nii, et sust laulja sai?
A must ei olõ lauljat saanu.
A sa laulat jo ütte laulu?
Lihtsähe mu umaaignõ kursaveli ja hää sõbõr Eliste Kaupo tekse üte hää luu ja kõnõl’ mullõ mulgu päähä. Selle et tel oll’ viil meelen, kuimuudu mi päält 30 aasta tagasi tudõngipõlvõn ütenkuun laulsõmi. Tudõngi jo õks laulva pall’o. A egä tuu, et ma no üte laulu olõ laulnu, must viil lauljat ei tii.
Kas avitit sõnno kah tetä?
Võrokiilse sõna omma õks Kaupo hindä tettü, ma tsipakõsõ kobisti kiilt õnnõ.
Kuis sa esi tulõmiga rahulõ jäit?
Viis om väega hää, sõna omma väega hää, suupill om perädü hää, niisamatõ kontrabass (kõik Kaupo mängitü) ja tagapõh’alaulja (Annika ja Kaupo) omma väega hää. Nii et taan luun om häid asju niipall’o hulga, et kõik tuu kaald üles ka küländ kehväkese laulja. Mullõ lugu miildüs, lihtsähe tekse üte as’a, et ku ma kunagi är koolõ, sõs olõssi võimaligult veidü säändsit asju, midä kahjatsõt, et pruuvmalda jäi. No sai mul laulminõ kah är proomitus.
UL
Laul Youtube’in:
