Põlva maakunna aastaga küläs valit Leevaku om tunnõt hüdroeelektrijaama perrä. «Tulkõ kaema, kuis eelektri tuutminõ käüse,» kuts aoluuhuvilinõ Konsapi Aigar, kiä tuud suvitsõl aol näütäs.
Leevakul eläs kirju perrä pia 300 inemist. Rahvas käü kokko inneskiste koolimajja, kon om raamadukogo kah. Üts küläelo vidäjä, Bergmanni Tiina kõnõl’, et külärahva kõgõ suurõmba tahtmisõ omma vahtsõnõ küläkeskus ja rattatii Räpinäle. Aastaga külä tiitli and tuus luutust mano.
«Nuuri om umajago pääle kasunu, vast võtt kiäki nuur küläelo vidämise üle,» märgot’ 20 aastakka Leevaku külävanõmb olnu Kasearu Vello minevä puulpäävä, ku tä MTÜ Põlvamaa Liikumine Kodukant pääligu Bleive Ahti käest aastaga külä tiitli vasta võtt’.
UL
Leevaku külä rahvas minevä puulpäävä Põlva maakunna aasta külä tiitlit vasta võtman.
