Luminõ talv lask koolilatsil lumõst rõõmu tunda. Räpinä valla Vilustõ kooli latsõ teivä vahtsõaastakuu lõpu sulailmuga koolimaja ümbre lumõliina. Egä klass sai hindäle vällä märki õkva säändse lumõkujo, nigu tälle meeleperrä om.
«Meil om joba sääne kommõ, et egä talv, ku lummõ om, tege terve kuul lumõliina. Nii teivä ka seo aasta kujjõ kõik klassi, oppaja ja klassijuhataja olli kah kamban,» selet’ Vilustõ kooli kihälidse kasvatusõ oppaja Salfi Krista, kiä lumõliina tegemist iist võtt’.
Et kimmäst teemat koolilatsilõ ette es anda, mõtõl’ egä klass uma kujo esi vällä ja löüdse toolõ õigõ paiga. Edimäne klass tekk’ rohilidsõ kilpkunna. Tõõnõ klass tekk’ mitu lumõst punnpaapu (leevike). Kolmanda klassi latsõ leivä koolimaja kõrvalõ üles lumõst elotarõ sohvadõ, tugitooli ja televiisoriga, sohva pääle tetti lösütämä ka kass ja pini. Neläs klass tekk’ seest spiraali muudu lumõlossi, värvse tuu sinitses ja nimmas’ Lumõkuninganna filmi perrä Elsa lossis. Lossi tekk’ ka viies klass, a tuu oll’ Eesti loss, kon tornõn olli sinimustvalgõ lipu. Kuvvõs klass tekk’ kooli sisehuuvi üte draakoni. Säitsmendä klassi kujomeistride käe alt tull’ vällä pingviin. Katsandal klassil sai valmis üükull, ütsäs klass vormsõ lumõst saajalgsõ.
Ku lumõkujo sattõva jo järgmädses pääväs vahtsõt lummõ täüs, kävevä latsõ noid viil puhtas pühkmän ja kujodõ man müllämän. A lummõ sattõ mano egä päiv, nii jäivä kujo õigõ pia lumõ ala.
No, ku ilma omma külmembä ja lumõkujjõ tetä ei saa, ammutasõ Vilustõ latsõ lumõrõõmu suusatamisõga. Spordiplatsi mano omma sisse aedu suuraraa, kon terve kuul suusataman käü.
Rahmani Jan
Vilustõ kooli neläs klass uman Elsa lossin. Salfi Krista pilt
Kolmas klass uman lumõst elotarõn, kon omma sohva, tugitooli ja televiisor. Sohva pääl lösüti ka lumõst kass ja pini. Salfi Krista pilt
Edimädse klassi latsi meisterdet rohilinõ kilpkunn. Salfi Krista pilt
