Seo kolmapäävä tähist’ Dr Fr. R. Kreutzwaldi Memoriaalmuusõum umma 80. sünnüpäivä. Eesti kõgõ vanõmb kiränigumuusõum om Kreutzwaldi kunagidsõn Võro-koton. Külälidse saava kaia sääl nelän huunõn näütüisi, miä andva võimalusõ Lauluesä elo ja loominguga süvembält tutvas saia. A aasta joosul plaanitas viil hulga tegemiisi, noist kõnõlõs ligembäle muusõumi juhataja HOLLO AIMI.
«Seo aasta pakk muusõumilõ häid võimaluisi Kreutzwaldi sõnomi kuulutamisõs. 155 aastat tagasi ilmu «Eesti rahva ennemuistsed jutud». 160 aastat saa vanas «Kalevipoeg». 95 aastat tagasi tetti vallalõ Kreutzwaldi mälehtüssammas. Ja edimädsele eesti kiränikulõ pühendet muusõumilgi om vannust 80 aastat: sünnütunnistus om vällä antu 10. radokuul 1941.
Mis sis om plaanin? Kivikunstnik Amandus Adamson tekk’ Kreutzwaldi mälehtüssamba. A inne oll’ konkurss, mis muidoki läbi sattõ. Ossavõtjit oll’ säidse ja vällä pakuti 15 kavandit. Muusõumi varakambrin om nii mõnigi alalõ ja mi panõmi nä vällä näütüsele. Lisas tetäs põimukuun kodolehe pääl valla virtuaalnäütüs «Samba lugu».
Võro instituut and vällä vahtsõ võrokiilse «Kalõvipoja». Meil om plaanin üten huviliidsiga märdikuust kooni mälehtüspääväni 14. joulukuul tuu ka päätükke kaupa ette lukõ. Kõrd nädälin kõnõldas muusõumin ka üts Kreutzwaldi jutt. Täpsemb teedüs tulõ kodolehe www.lauluisa.ee pääle.
Muusõum om 80 aastat vana. Maja viil vanõmb, ehitet 1793. Taad Kreutzwaldi kodokõist om püütü iks kõrran hoita, nii nigu väke ja võimu om olnu. A nii ilostõ kõrran ei olõ tä kül viil kunagi olnu. Õigus või olla ütel reisisellil, kes ütel’ läbisõidun ollõn, et Võro liina visiitkaardi aadrõss om Kreutzwaldi uulits 31. Muusõumin muidogi tä käünü es olõ, kost tuu aig võtta. A ka noilõ, kes siin mitugi kõrda omma käünü, om jäänü üts uss 80 aastat kinni (Kreutzwaldi elomajapäälse uss – toim) ja ussõtagunõ saladusõs. Ja saladusõ ei saaki kõigi jaos avalikus, sis ei olõ tuu inämb saladus. A tuud ma lupa külh, et kõik, kes tulõva «Kalõvipoiga» lugõma, saava tuu ussõ uma käega vallalõ käändä.
Kül kõik lätt kõrda, ku piämi meelen dr Kreutzwaldi soovitust: «Tervüs om jumala armuandõ siäst kõgõ ülemb vara siin aolikun elon. Tuuperäst tulõ pitä sedä taiva kingitüst kallimbas ku kulda.»»
