Vikipeediä perrä om kambaull’us (massipsühhoos) suurõn inemiisi hulgan tegünenü sais, kon inemise ei mõista olokõrda mõistusõga hinnada ja mõistlikkõ asjo tetä. Seo om ka hindäkontrolli kaotus ja paanika. Kambaull’usõ tegünemisele avitas üten peris vai ettekujotõt oht ja petüjuttõ uskmahärgütämine.
Kuigi tõistmuudu ei mõista ma parhilla maailman valitsõvat olokõrda kutsu. Häste lavastõt pettüs, inemiisi ullitaminõ poliitiliidsi võimumänge peräst.
Sõnavabadus om osast kaonu. Joba sügüsest pääle kaosõ Mol’ovihust artikli, miä koroonamaastigu õigõt näko näütäse, näütüses ku sõnna võtva arsti, kiä ei olõ nõun võlssma, vai vaba meediä esindäjä.
Mi panõmi vast imes, kuis om võimalik, et Hitler sai massi juutõ vasta üles käändä ja miljoni inemise naksi natsis. Inämbüs inemiisi ommaki väega kergele manipuleeritävä ja läävä lihtsäle vooluga üten. Ja avastasõ ülearvo ilda, ku sügäväle kuristikku om umahindä kriitilidse mõtlõmisõ puudumisõ peräst jõutu.
Minno pand imehtämä, kuis mindäs hinnäst priitahtligult vaksiniirmä ja lastas hindä sisse panda määnestki kihvti, mink õigõt ja pikäaolist mõomist mi kiäki jo ei tiiä. Tunnõ hulga vaksiinikahjustuisiga latsi vanõmbit. Ku olõt näide tragöödiaga kursin, ei tulõ esiki säänest mõtõt, et võinu hinnäst vai latsi vaksiniiri. Üle kümne aasta tagasi uursõ vaksiniirmise tagamaid ja kõnõli esi arstõga, kiä kinniti, et ummi latsi nä seo kihvtiga määndselgi juhul ei saastas, a et umma tüükotust hoita, es saa nä ka sis seost avaligult kõnõlda.
Kareda Saale om olokõrra häste kokko võtnu: «Vastutusõst kõrvalõhiilmises tulõ aoluun läbiproovitu võttõna luvva vainlasõ kujo. Seo jaos passis väega häste üts imetsill’ukõnõ viirus, midä piäaigu ei näe ja kontrolli ei saa. Tuuperäst saa mittekõlblikkõ teste ja häid kambaull’usõ tekütämise võttit tarvitõn veerütä timä kaala kõik süü laivakerren haigutava mulgu tegünemise iist. Kokkomäng surmahirmuga. Üteldä, et mitte rüüvmajandus ei säe ohto ello planeedi Maa pääl, a pandeemiä. Seo mängu reeglide man olõ-i ütski asi pühä.»
Ku kõik mi võtnu vastutusõ uma elo iist ja julgunu võlsspandeemiä paadist vällä astu, sis võitnu ütiskund peris pall’o.
Lumiste Kati
Kiränik Lumiste Kati and värskit mõttit, kuimuudu egäpääväello vaeldust löüdä ja märgotas tuust, miä parasjago süäme pääl.
Toimõndusõlt. Esi inemiisil omma ilma asju kotsilõ esisugumadsõ arvamisõ, midä om hää teedä. Tervüst pututavin küsümüisin soovitas Uma Lehe toimõndus kullõlda tuud, midä välläopnu tohtrõ kõnõlõsõ.
