Seol nimel om parla Eestin 28 kandjat. Eesti kiräkeelen sama tähendüsega nimel Kasin om 21 kandjat. Pandmisõ aigu kirutõdi egäl puul vanan kiräviien Kassin, õnnõ et võro keelen loeti taad vällä Kassin, (kelle uma?) Kasina, Saarõmaal loeti Kasin, (kelle uma?) Kasina. Priinime pandmisõ kotussit oll’ neli.
1809. aastagal Kanepi kihlkunnan Hurmi vallan saiva seo nime Kopski Andrõssõ läsk ja latsõ. Nimi läts edimält edesi poja Püsnigu Hindrik Kasina kaudu, a kuuli sõski vällä 1840. aastagal. Kanepi Roth pand’ ka tõisi umahust näütävit nimmi nigu Ilda, Kallis, Kawwen, Körran, Römus (Rõõmus), Selge, Terraw, Tullus, Ussin, Wöras (Võõras), Ökwa jt.
Haani mõisan oll’ Kasina lisanimi joba inne priinimmi pandmist olõman. Kassina Petre Tannil Purka küläst, timä vele Juhan ja Jaan ummi perridega sai seo priinime. Kõik, kinkal Võrumaal sääne priinimi om, ommagi nime saanu Haani Kasina Piitre suguvõsast. Üts Haani Kassin om eestistämisel võtnu nime Ojaste.
Saarõmaal Kaarma-Suurõmõisan panti Kassin Kahvri talun. Sääl mõisan panti ka muid inemise umahust näütävit nimmi, nigu Aggar, Aus, Oige jt. Lümanda mõisan panti Kassin katõlõ Aadulõ, üts Kleemu Hansu, tõnõ Laratsi Tõnissõ poig. Arvada, et nä olli umavaihõl sugulasõ. Mõlõmban Saarõmaa kotussõn pantut nimme naati XIX aastagasaa lõpun kirutama Kasin.
Sõna kassin tuuaolinõ põhitähendüs om viil är tunda vanamuudsan sõnapaarin kassin naistõrahvas. Wiedemanni sõnaraamadu edimäne tähendüs: kombõlinõ, siivsa, karsk, puhas, kõrralinõ, mõõdukas, tasalik, viisakas. Kassin sõna om ollu näütüses viisakas ütlemine ropu as’a kottalõ ehk eufemism. Tõnõ tähendüs, et kassin tähendäs veidüt, om olõman olnu rohkõmb Põh’a-Eestin. Võro keelen saa ei siiäni üteldä, et inemine om kasina jutuga, iks veitü jutuga om.
Vinne keelen om kah perekunnanimi Kassin (Кассин), saad külänimest Kassinõ (Кассины) Vjatka kubõrmangun (Kirovi oblast). Mõni Eesti elänik või olla ka tuu vinne nime kandja, selle et Eestin lövvüs vinne nime naisvormi Kassina. Hoobis tavalidsõmb vinne nimi Kasjanov tulõ edenimest Kasjan (Касьян), saad ladinakeelidsest inemisenimest Cassianus. Tävveste võimalik, et Kasina Piitrel Haanin oll’ säändse nimega edevanõmb.
Saarõ Evar
Rubriigin kõnõldas perekunnanimmi periolõmisõst ja tähendüsest.
