Väikust Taivaskuast juusk vällä külmä ja selge viiga Imäläte. Tuu om Taivaskua kõgõ suurõmb läte ja rahvas pidä tuud pühäs. Arvatas, et Imälätte vesi avitas silmänägemist praavita. 2013. aastagal vaiu Imälätte koobasuu sisse. Tuust aost pääle om lättevesi tassakõistõ kuupa valla uhtma naanu. Nigu ka pildi päält nätä, nakkas koobasuu jäl umma kujjo tagasi võtma.
«Imälätte kuup kasus õga päiv tassa mugu suurõmbas,» kinnitäs Taivaskua külävanõmb Bleive Ahti, kiä om aastidõ joosul Imälättel silmä pääl hoitnu.
Taivaskoda Põlva kihlkunnan om üts tunnõtumpi luudusliidsi pühäpaiku Eestin. Inemiisile miildüs sääl kävvü ja perämädsel aol om huvi Taivaskuan rännädä suurõmbas lännü. «Taivaskuan om väega hulga rahvast nakanu käümä, rohkõmb ku innemb. Joba minevä aasta keväjäst pääle om tan aig-aolt nigu laulupido,» om külävanõmb Bleive Ahti tähele pandnu.
Rahmani Jan
Imälätte kuup Väikun Taivaskuan 18. urbõkuul 2021. Rahmani Jani pilt
