Timahavadsõ Tarto latsikirändüse avvohinna sai Võromaa kiränik Laanõ Triinu raamatuga «Luukere Juhani juhtumised». Pildi om toolõ raamatulõ tsehkendänü Platsi Marja-Liisa.
Kiränik Laanõ Triinu seletäs, kuis avvohinnat raamat sündü: «Luukere Juhan om periselt kah olõman: tä eläs Kütioron mu sõpru man ja om innegi kultuuri- ja kunstiprojektest ossa võtnu. Taa raamadu päätelegäse prototüüp ja timäga juhtunu as’a omma niivõrra pöörädse, kirändüsligu – et näist õkvalt pidi raamat saama. Nii et nii mõnigi raamadu lugu om tougat mõnõst peris elon olnust trehvämisest.
Ja tõsõs kiroti ma taa raamadu suurõst soovist jagada lugõjidõga umma unistust mõtsikust latsõ- ja vanaduspõlvõst, midä mi kõik väärt olõmi. Mu unistuisi mõtsikun elon om vabahus ellä nii, nigu meile miildüs, juvva hummokidõ luukerega kohvi kasvai, ku tuus piässi tahtmist olõma. A tuun elon om ka vastutust, sügävät arvusaamist tuust, ku kimmält mi, inemise uma elokeskkunnaga köüdedü olõmi.»
UL
