Valmis om saanu latsiaokirä Täheke timahavanõ võrokeeline nummõr.
Aokiri om kaasõst kaasõni võrokeelitsit juttõ ja luulõtuisi täüs. Nuu omma kirotanu Contra, Ilvesse Aapo, Kivirähä Andrus, Kochi Helena, Laanõ Triinu, Panga Milvi ja Rahmani Jan. Viil saa aokiräst teedä, midä põnõvat või nätä Alaveski eläjäpargin Saru külän, lukõ, ku huvitav kala om haug, ja oppi tegemä maasigatorti. Lukõ saa ka nall’u ja latsi kirotõduid juttõ, lahenda ristsõnna, kaia koomiksit ja meisterdä.
Seokõrdsõ võrokeelidse Tähekese kaasõ om tennü Kurema Kadi, pilte omma tsehkendänü Ernitsa Heiki, Platsi Marja-Liisa, Odra Sirly, Oolbergi Taavi, Mõttusõ Kadi, Rõõmusõ Jaan ja Sildre Elina. Aokirä toimõndaja olli Martsoni Ilona, Hinrikusõ Kadri, Fastrõ Mariko ja Rea Priit.
Võrokeelist nummõrd jaetas kõigilõ 1. klassõ latsilõ üle Vana-Võromaa ja kõigilõ, kiä koolin võro kiilt opva. Tsipakõsõ pandas müüki ka Võro instituuti (Tartu 48, Võro liin), kost saa osta tõisigi võrokeelitsit välläandit.
UL
Tähekese edekaas.
