Seo kuu alostusõst läts’ vallalõ Vana-Võromaa pildijaht päälkiräga «Püvvä pildi pääle!». Kõrraldaja uutva võistlõma pilte, kon omma pääl mi kandilõ umadsõ tegemise.

«Vanal Võromaal olõ-i õnnõ paiga väke täüs. Tan om ka ummamuudu elämine-olõminõ, miä om väärt pildi pääle püüdmist,» kutsva fotojahi kõrraldaja inemiisi üles võistlusõlõ pilte saatma. Ettevõtmist kõrraldasõ Põlva ja Võro maakunna arõnduskeskus ja Võro instituut.

«Kutsumi kõiki, kiä pandva tähele Vanalõ Võromaalõ umatsit asju, tegemiisi ja toimõndamiisi, noid pildi pääle üles võtma. Pilti või tetä telefoni vai pildimassinaga ja ku tulõ hää pilt, sis tuu võinu fotojahi kodolehe pääle üles laati. Sääl saava tõõsõ kah pilte hinnada ja ku om väega hää pilt, või tegijä tuu iist avvuhinna saia,» seletäs Põlva maakunna arõnduskeskusõ turismiarõndusjuht Kahu Kristi.

Pildijaht läts’ vallalõ 1. piimäkuust ja käü nika ku poolõ rehekuuni. «Terve suvi jääs sis pilte tegemises. A või saata ka varrampa, näütüses talvitsõl aol tettüid pilte. Tuu tulõ lihtsäle är märki, kuna om tettü,» seletäs Kahu Kristi.

Pildijahi pääavvohinna saaja vali vällä hindamiskogo ja võitja saa fotopoodi 300 euro suurudsõ kinkekaardi. A vällä loositas ka tõisi avvohindu ja preemiä saava ka nuu, kink pilte omma tõõsõ kõgõ inämb hinnanu. Avvohinna pandva vällä Vana-Võromaa ettevõttõ.

Ossavõtjil tulõ pildi üles laati fotojaht.visitvoru.ee lehe pääle. Sääl om tuujaos eräle keskkund ja kirän ka riigli, kuis täpsempä toimõnda.

Kuis tull’ mõtõ sääne fotojaht kõrralda? «Olõmi tan kultuuripiirkunnan jo aastit kuuntüüd tennü ja iks om tulnu tarvidus mõnõ pildi perrä, et näüdädä, määne taa kultuuriruum om ja miä omma mi kandilõ umadsõ tegemise,» kõnõlõs Kahu Kristi. No pakutaski inemiisile võimalust mi kandilõ umast üles otsi ja pildi pääle püüdä, et tuud saanu ka tõisilõ näüdädä. Näütüses oodõtas pilte pillimängost, paikligõ rahvarõividõ kandmisõst, savvusanna kütmisest ja sannan käümisest. «A pildi pääle võiva olla püütü ka säändse toimõndusõ nigu kirvõga puiõ lahkminõ ja riita säädmine ja vikatiga hainaniitmine. Ka noid asju inämb egä päiv ei näe. Pilte või olla ka söögitegemisest vai mõnõst küläpidost, näütüses jaanipääväst,» and Kahu Kristi tsihi kätte.

Margna Epu kujondus

Miä noidõ piltega sis perän tetä plaanitas? «Meil olõs hää miil, ku mi mõnt pilti saanu tarvita taa paikkunna turundamisõ man. Iks tulõ ette, et om vaia mõnt kaarti vai muud trüküst tetä, kohe pilte vaia lätt. Ka sotsiaalmeediähe om vahepääl hää mõni pilt üles panda, tuu man loodami kah võistluspilte pääle,» seletäs Kahu Kristi.

Mille inemise võinu seost fotojahist ossa võtta? «Üts põhjus omma hää avvuhinna. Pääle tuu pakk seo võistlus egäleütele võimalusõ näüdätä ummi ägedit pilte. Nigunii inemise postitasõ peris pall’o pilte sotsiaalmeediän, a ku nuu üles anda fotojahilõ, saa suurõmb hulk inemiisi noist rõõmu tunda,» löüd Kahu Kristi.

Viil tuu Põlva maakunna turismiarõndusjuht vällä, et innekõkkõ oodõtas pilte tegemiisist, mitte nii väega luudusõst. Teedüst pildijahi kotsilõ jaetas lisas arõnduskeskuisi kodolehtile ka sotsiaalmeediän ja vällä pandas plakati.

Rahmani Jan

Põlva maakunna arõnduskeskusõ turismiarõndusjuht Kahu Kristi Põlva keskliinan lõõdsakuninga Kikka Karla kujo man. Rahmani Jani pilt