Kolmanda Juhan Jaigi nimelidse jutukõnõlõmisvõistlusõ video omma no är hinnadu. Kõgõ parõmbas tunnist’ hindamiskogo Rõugõ põhikooli opilasõ Trummi Arturi video, kon tä kõnõlas Kalkuna Henn-Hillari luku «Kuis ma puuki tei». Võidutüüd juhendiva Nagla Anneli ja Trummi Janek.
«Artur oll’ umma rolli õkva ku elokutsõlidsõlt sisse elänü. Paigan olli nii kõnõlõmisõ tempo, helükujundus, kostüümivalik – kõik,» kitse hindamiskogo edemiis, Von Krahli tiatri näütlejä Truuba Markus. Kittüst jakku täl ka tõisilõ. «Seo jutuvõistlusõ võitja omma kõik, esieränis võro kiil ja kultuur. Mõni oll’ inämb tüüd tennü helüga, mõni montaaþiga, mõni kostüümiga, a ma näi mitmin hindä tulõviku tüüseldsiliidsi, kinka kuun tetä kas filmi, raadiotiatrit vai näüdeldä,» löüdse Truuba Markus.
Timäga kuun kai kõiki võistlusõlõ ülesantut katsat videot ütsä erinevä jutu ja 14 esitäjäga Võro instituudi võro keele ja kultuuri as’atundja Nagla Triin, kiä sõnast egäle jutukõnõlõjalõ kittüse ja tuu, midä edespiten tasusi viil parõmbalõ tetä. Hindajil jakku eräkittüst kõigilõ videotöie tegijile. Haani kooli opilasõ Rõõmusoksa Liisbet ja Viidu Märt saiva hää selge esitüse ja keele eräpreemiä. Nä kõnõliva üten videon kattõ luku, a esitüsele oll’ ant lavastuslinõ Jaigi loominguga olõmisõ raam. Haani opilaisi juhend’ Leidi Kersti.
Võro Kreutzwaldi kooli opilanõ Koreiniku Joonas sai paigavaimu nättäväs kõnõnõlamisõ eräpreemiä, tedä juhend’ Linnamäe Helena.
Raadiotiatri eräpreemiä saiva Harglõ kooli opilasõ Truksi Robert, Järve Siim ja Mikk kuun oppaja Sulevi Urvega, kiä oll’ ümbre pandnu ja kohandanu Toometi Tiia jutu «Ahvipoeg, kes ei tahtnud areneda» võrokiilses luus «Arotaminõ elo üle».
Kokkomängu eräpreemiä saiva Kinna Marten ja Volmani Friida Kääpä koolist, näid juhend’ Kähri Jana.
Ilosa ja selge jutukõnõlamisõ iist sai tunnustusõ Mõnistõ kooli opilanõ Piirjõe Ralf, Läniku Marleen sai ilosa võro keele eräavvohinna. Mõnistõ latsi juhend’ oppaja Pazuhanitši Asta. Julgusõ ja mängulusti iist saiva kittä Parksepä kooli opilasõ Potteri Laura ja Murde Kerdo, kedä tsusksõ takast oppaja Käre Ene.
Kõiki võistlusõlõ üles antuid töid saa kaia Youtube’ist kanali «Jaigi jutuvõistlus» päält.
Võistlusõ kõrrald’ Võro instituut, avvohinnakottõ avit’ täütä Eesti Kultuurkapital.
UL
Pilt Rõugõ põhikooli opilasõ Trummi Arturi võiduvideost, kon tä kõnõlõs Kalkuna Henn-Hillari luku «Kuis ma puuki tei».
