Võro Keskliina kooli opilaisi minevä nätäl Kandlõn ette kant võrokeeline muusikal «Koolin om umbõlõ mõnna» tekk’ tujo hääs: Contra luud sisukäük ja tekst, Rips-Laulu Pireti muusiga omma meistritüü, a noil avit’ vallalõ päsedä osatäütjide mängorõõm, mille pandsõ kasuma kooli uma lavastustiim.
Või jo mõtõlda, et mis tan iks, pikält kultuuripaastu pidänü päältkaeja löövä kässi kokko joba tuuperäst, et omma üle tiatrisaali ussõpaku lubatu. Võimalus, et om jäl kohegi minnä, või tõtõst suu naarulõ kisku, a hõkõrdama iks ei aja. Nii et naarupurtsatusõ, miä saalin etendüse aigu vallalõ pässi, kõnõlõsõ iks tuust, et oll’gi nall’akas. Pall’o tuud iks juhtus, et tiatrin helüga naarda saat. Inäbüste olõt esiki janti kaiõn tenolik, ku saat kröömikese mujahta.
Contral om õnnistunu piaaigu poolõtõsõ tunni sisse köütä hulga täämbädse ao nuuri mõttit, tegemiisi ja murrõkotussit, alatõn opilasfirmadõst ja lõpõtõn koolikiusamisõ ja keerolidsõ noorõ iä esihindä löüdmisega. Kõgõ takan om siski lämmi huumor, miä ei lasõ kohegi tummõhe mulku vajju. Iks aoviidüs mis om aoviidüs!
Muusikalõ om säändsit ja määndsit. Seo lavatükü tege esierälidses muidoki kiil. Contra om hää keeletundjana mõistnu võro kiilt tutvas ja huvitavas tetä mitund muudu: eesti ja võro keele sõnnu, võro ja inglüse keele sõnnu kõrvuisi sääden, niisama vanarahva ütlemiisi ja esiki kulunuisi vällendüisi (ek klišee) kaudu. Kõik om võro keelen olõman.
Viiemeistrel Rips-Laulu Piretil om seo lavatükü meeleolo luumisõl muidoki sama suur osa. Timäl om lännü kõrda säädi viie nii, et kullõja saa tundõlidsõlt üten õõtsu, sõrmõnipsu lüvvä, räpirütmiga üten minnä.
Pikk pai tulõ tetä ka osatäütjile. Üts tegeläne lugõ aokiräst nõvvoandit elosaisõ kotsilõ ja sääl om kirän soovitus: olõ hindä ullimb versioon! Kuuldus küländ poolõmeelelitselt, a sääl om uma jüvä seen, selle et täütä ei olõ seod kuigi lihtsä. Rolli saanu opilasõ julgusõ olla lava pääl hindä ullimba variantsi ja seo om kimmäle üts konks, mille otsa näütemängo kaeja jääs.
Suurõmb jago lauljidõ-tandsjidõ seltskunnast omma 6. ja 7. klassi opilasõ. Tuu om kül häste: sis ei kiirusta nä niipia Võrolt minemä ja joudva vast lavastust viil mängi. Kas vai ummilõ iäseldsiliidsile tõisist koolõst. Hoidkõ kõrva vallalõ, nigu üteldäs muusikalin.
Kabuna Kaile
Pääliina poiskõsõ Cristopheri (Tambergi Karl Cristian, pildi pääl häädkätt) tulõk ütte Võromaa kuuli sünnütäs timä ja vahtsidõ opiseldsiliidsi jaos edimält segähüst, a lõpp hää, kõik hää. Antoni Tõnisõ pilt
