Kauksi Ülle «SETO IKEBAANA»
Toimõndanu Palmi Silvi, kujondanu Lööperi Priit
Kaasõmaali tennü Riitsaarõ Evar
Välläandja: Seto Ateljee Galerii 2021
Ütel pääväl oll’ mu tüülavva pääle ilmunu raamat. Kauksi Ülle «Seto ikebaana», seen väiku pühendüs «Tervüisi Obinitsast!».
Luulõraamatit trehväs perämädsel aol häbemäldä veidü mu kätte. Tuu om muidogi hindä hoolõtus kah. A Kauksi Ülle luulõtuisi taha iks lukõ: tego om väega hää luulõtajaga, kiä ehitäs uman luulõn üles tävveste umma maailma. Maailma, midä muialt kirändüsest nii nal’alt ei lövvä ja kon vana tarkusõ omma avvu seen. Kiränik esi ütles kah joba raamadu alostusõn är, et es lövvä uma kirändüsharidusõ tii päält periselt umma ja pidi tuuperäst, et pall’o om viil ütlemäldä, uma kirändüse luuma.
Ku hariligult omma Kauksi Ülle luulõtusõ inämbüisi vabanvärsin, sis tan raamatun om hulga riimivormiga luulõt. Om sonette ja tangosit, sekkä peotäüs haikusid. Ei olõ ka midägi imehtä: osalt jaolt om tego laulusõnno kogoga, kuigi mu jaos tüüti naa teksti iks inämb luulõtuisina. Kujoti lukõn, kuis Kauksi Ülle esi näid ette lugõ ja tuu oll’ võimsa tunnõ. Ülle mõist hinnäst väega usutavas lukõ ja kõnõlda, tuuperäst tuu tunnõ pääle tull’. Ehk sis: tego om elävä luulõga, midä tahtnu õkva kullõlda. A taad saa iks umaette kah lukõ.
Raamadu teksti omma kirotõdu aastil 2019–2021. Hulga om raamatun Setomaa-teemat, a sisse trehväs ka latsõpõlvõ Võromaa-lugusiid.
Nigu hää raamadu man iks, nakkasõ silmä läbi raamadu mõnõ tegeläse ja kujondi. Nii tulõva mitmõn paigan ette mar’asahvti kiitjä naasõ kavvõst aost ja täämbädsest pääväst, üts kits käü raamatut pite ja jürä kuldreneti uibut. Om murõ, et mõtsan näge hulk täämbädse ao inemiisi õnnõ puitu, ja murõ ka tuu peräst, kuis latsõ ülearvo arvudimängumaailma är kaosõ. Om kittüslaulu luudusõlõ ja häitsemisele, a om ka oppuisi naisilõ ja tihtipääle tulõva mõnõ suurõilmadaami kah mängu.
Nii taa sis omgi, et ütest külest om tego vana hää Kauksi Ülle luulõga, a tõõsõst külest om taa raamadu seen timä jaos mitte nii egäpääväst vormiluulõt, kõik iks Kauksi Ülle kimmä firmamärgiga mahla seen. Seo om jõvvukohanõ raamat ütekõrraga läbilugõmisõs, a jääs ka pääle tuud värskis.
Aituma, Ülle! Tervüse omma kätte saadu. Saada sis umalt puult vasta kah!
Rahmani Jan
