Seo kuu lõpun tulõ Navi külän püüne pääle ilmakuulsa näütemäng «Godot’d uutõn».
Lavastaja Tubina Taago ütles tükü kotsilõ niimuudu: «Taa om üts maailma kuulsamb ja inämb mängitü näütemäng. Või olla peris kimmäs, et egäl aohetkel, ka seolsamal aol, ku ti taad loeti, mängitäs tedä kongi. Tuuperäst om väega tähtsä, et tä lõpus ka võrokeelitsenä sünnüs. Ja mõos tä säändsenä, nigu olõski võro keelen kirotõt. Lisas om uutminõ, midä tundva seo luu tegeläse, väega üttemuudu uutmisõga, mink seen mi olõmi elänü perämädse poolõtõistku aasta joosul, kinniolõki ja piirangidõ aol. Uutõn, kuna taa jama läbi saa, kuna tulõ pakk vai söögikullõr, kuna mi jäl umavaihõl kokko saami jne. Kuigi mi ei tiiäki kõgõ, ku kavva mi uutma piämi, pakk trüüsti tiidmine, et mi olõ-i uman uutmisõn ütsindä.»
UL
Minevä nädälivaihtus kävevä tävve huuga Godot’-tükü proovi. Pildi pääl nakkas õkva lugõmispruuv pääle: näütlejä (kuralt) Tagametsa Tarmo, Trolla Agu, McGinley Patrick ja Ruusmaa Vootele omma hinnäst valmis säädnü, näid kullõs lavastaja Tubina Taago (säläga). Rahmani Jani pilt
