Timahavadsõ Villändi folgi teema oll’ kokkomäng. Kokko­mängmise rõõmu sai pall’o nätä kontsõrtõl, tüütarrin ja ülesastmiisil uulitsidõ pääl.

Nii mõnigi kokkomäng oll’ sündünü mõttõst, mink perrä passitiva as’aosalidsõ kokko edimädsel päälekaemisõl kokko­pandmisõs harinõmalda asja. Olkõ tan vällä tuud mõnõ võrokõisiga köüdetü ettevõtmisõ.

Näütüses esit’ rahvusmiiskuur (dirigent Üleoja Mikk) üten Roose Celia, Kanni Tuule ja Jürjendali Robertiga kava eesti rahvalaulõga. Kava oll’ alostusõst lõpuni läbi komponeerit – millega mi ei olõ vast regi­laulu puhul harinu –, a es mõo tuugi­poolõst kunstligult. Arvada oll’ uma osa tuun Roose Celia regilaulu kõlapildi perrä tettüil koori­säädil.

Kuslapuu Kaisa ja Laanekase Karl mängsevä eesti rahvamuusikat pille pääl, midä taadmuudu muusikaga just sakõstõ kokko ei köüdetä: klavõri ja bandþoga. Ja tõistpite – ka klavvõr ja bandþo olõ-i pilli, midä hariligult kuun mängitäs. Ummõhtõ (vai just tuuperäst?) sai lavalt kuulda mõnusalt värskilt improvisatsioonilist rahvamuusikat. Kusla­puu Kaisa selet’ki, et lisas hääle klapilõ uma lavaseldsilidsega kuts tedä klavõriga rahva­muusikat esitämä just suuv näüdätä kullõjilõ taad pilli harinõmalda nuka alt.

Ansambli Viik köüt kokko Lepassoni Kadri ja Kaasiku Oti, kiä otsõva 12keelelidsel kandlõl ja kitarril kokkokõlamist perimüsmuusikast inspiratsiuuni saanu umaloominguliidsi lukõga. Näide muusika oll’ detailõni läbi mõtõld, a ummõhtõ mängu­lusti täüs ja ummist lukõst kõnõ­liva nä kullõjilõ sakõs­tõ päälkirju kaudu.

Kokkomängu meistriklassi näüdäs’ kuulu perrä ka miihilaulu tüütarrin tegünü sünergiä. Üts põlinõ miihilaulu tarrin käüjä näkk’ edimäst kõrda päält, kuis laulu jakku neläs tunnis ja inämbgi viil. Midä tunn edesi, tuud kokkomängulidsõmb oll’ olõminõ, tuud keerolitsõmpi laulõ julõti ette võtta ja noid ka spontaansõlt mitmõ helü pääle laulda.

Kõigi naidõ näütide puhul sai selges: kokkomängus om vaia julgust tetä midägi vahtsõt muudu, niisamatõ mängulusti ja aigu.

Laanõ Triinu

Regiram: Rahvusmiiskuur kand üten Roose Celia, Kanni Tuule ja Jürjendali Robertiga ette kava eesti rahvalaulõga. Muumi pilt