Säändsel kujul nigu päälkirän kand seod nimme 20 inemist Eestin. Rohkõmb om nimekuiu Apsolon (44). Osa Apsolonõ om Vanan-Antslan pantu nime suguvõsast, a osa hoobis Vinnemaalt, selle et ka sääl tulõ ette nimme Apsolon. Olõ-i teedä, et näütüses Nõvvukogu filminäütlejä Andrei Apsolon, kiä sündü 1908. aastagal Pihkvan, olõssi nime saanu mõnõst alguperätsest Eesti Absaloni suguvõsast. Lisas lövvüs Eestin vähämb muutunu nimekuiu Apsalon (14).
Vana-Antsla mõisan panti Absalon kõikilõ inemisile üten Rüütli talun (sama kotus, kost ildamb oll’ peri Kangro Bernard). Nime saaja olli Mihkle poja, peremiis Ants ja veli Jaan, lisas viil kavvõmbast sugulanõ Toomas, kõik ummi perriga. Hingelugõmistõ panti Habsalon, a sääntsel kujul olõ-i nimi täämbädse pääväni joht tarvitusõl.
Suurõ-Pakri saarõ pääl ruutslaisi kesken panti Absalon esäle-imäle ja 37aastadsõlõ pojalõ, kinkal oll’ kül naanõ, a olõ-õs (viil) latsi.
Türi-Alliku mõisan Järvämaal panti Absalom Kondi Kaarli perrele. Ka keriguraamatun 1844–1853 oll’ perrepoigõl sama priinimi. Või-olla, et täämbädsel pääväl alla kuvvõ kandjaga nimi Absalom omgi Türi-Allikult peri. A või ka olla, et tuu nimi kuuli vällä ja Absalomi omma kah Vanast-Antslast.
Seo nime originaalilõ kõgõ ligemb kuju omgi Absalom. Nimi om võet piiblist. Absalom oll’ Taaveti kolmas poig, heebreä keelen tähendäs seo nimi ’mu esä om rahu’. Vinne kiilde om piiblinimi, midä üteldi vällä [abšaalom ~ abišaalom], jõudnu kreeka keele kaudu kujul Avessalom, a vindläse taad edenimes väega hää meelega es panõ. Kül võti germaanlasõ joba keskaol taa nime pruukmistõ väiku muutusõga ja Taani riigi kuulsa Lundi pääpiiskop, kiä kuuli aastagal 1201, kandsõ kristlikku nimme Absalon. Tuuperäst või üteldä, et Absalon om ka edenimi, eriti taanlaisi-ruutslaisi-norralaisi jaos. Vanaaolidsõ Absaloni tävveste harilik mugandus om Aksel vai Axel.
Vanan-Antslan ja Türi-Allikul võeti nimi sõski kimmäle õkva piiblist, selle et ka pall’u tõsõ perre saiva sääl piiblinime. Vana-Antsla nime n-lõpu põhjusõs om rahvaperäne saksa keele ja maakeele pruuk, muidu oll’ maakiilsen piiblin iks kah kirän Absalom.
Nimmi eestistämisel võtiva Urvastõ vallan vahtsõ nime Asula üts perekund nimega Absalon ja tõnõ nimega Absalom. Vaabina vallan võtsõ üts Absalon vahtsõ nime Haabsalu.
Saarõ Evar
Rubriigin kõnõldas perekunnanimmi periolõmisõst ja tähendüsest.
