Kas sa tiiät, määntse omma mõtsuibu, kitsõuibu ja soeuibu? Tiit vaiht mõtsliivapuul, maavihapuul ja kuslapuul, lõhmussõl ja pähnäl? Ku ei, sõs tulõ Võro instituudi alomadsõ kõrra saali kaema Hiiemäe Mari pildinäütüst «Puul mõtsa». Pilt ja sõna ütenkuun avitasõ kõgõst parõmbahe arvu saia. Näütüsel om kolm kiilt: ladina, eesti ja võro.
Näütüse tegeläse omma Eesti mõtsun kasuja puu ja puhma. Mõnõ naist olõ-õi nii hariligu, mõnõ omma jälki peris hariligu. Mõnõ omma üles joonistõdu häitsvält, tõsõ süküsvärven; mõni puu om lehildä, mõnõl omma vilä külen. Näütüsetüü omma vällä validu Mall Hiiemäe «Väike puu- ja põõsaraamat rahvapärimusest» (2020) jaos joonistõduidõ pilte hulgast.
Pildinäütüs jääs vallalõ katõs kuus.
Fastrõ Mariko
Hiiemäe Mari. Fastrõ Mariko pilt
