Tulõva kuu alostusõn, 1.–7. märdikuuni peetäs võro keele nädälit. Timahavadsõ võro keele nädäli lõugahus om: «Kiildke vai är – ma iks kõnõlõ!» Seokõrd om nädäli reklaaminägo ja võro keele näüdüsagent Räpinä miis Ilvesse Aapo.
Timahava om võro keele nädäli plaanin hulk ettevõtmiisi. Näütüses jõud püüne pääle maailma edimäne võrokeeline pistüjalapull (stand-up-komöödia) «Kogõmus mass!». Ruitlasõ Olavi kirotõdu nal’atükü sääd lava pääle Tagametsa Tarmo ja mäng Määri Andres.
Tüüle nakkas ka edimäne võro keele iistkõnõlõja. Iistkõnõlõjit valitas avaligu elo tegeläisi hulgast, kiä lupasõ ammõdiaol ummin tegemiisin ja ülesastmiisin võro kiilt pruuki hariligust inämb. Iistkõnõlõja ammõdiaig om üts kuu pikk ja sõs antas teedüspulk üle järgmädsele.
Eesti Rahvusringhäälingu Jupiteri kanali pääle plaanitas võro keele nädälis üles säädi eräle teemarida võrokeelitside saatidõga läbi aigõ.
Nädäli kavan om viil Uma Pido koorilaulukonkursi kontsõrt, kon konkursilõ tulnu parõmba pala ette kannõtas.
Püüne pääle jõud vahtsõst ka koolimuusikal «Koolin om umbõlõ mõnna».
Võro keele nädälit pidävä kimmäle kooli, latsiaia ja muusõumi.
Huvilidsõ saava viil üten lüvvä mängun «Võrokõsõ välläkutsõ», et võro keele pruukmist har’ota.
Umal Lehel tulõ võro keele nädälil vällä 500. nummõr.
Agendikampaania lätt edesi
Timahava lätt võro keele nädälil edesi ka minevä aastak alostõt võro keele agente kampaania, kon huviliidsi kutsutas üles vällä näütämä võro keele mõistmist ja härgütämä tõisi kah võro kiilt pruukma. Seokõrd om võro keele näüdüsagent ja võro keele nädäli reklaaminägo Räpinä kultuuritegeläne Ilvesse Aapo.
«Ma olõ Ilvesse Aapo ja tii, mis taha. Näütüses kõnõlõ võro kiilt, ku taha, ja tii laulõ, ku taha,» seletäs tä umma missiooni vallalõ. Ilvesseaapolist vabahusõ- ja protestivaimu õhkas ka timahavanõ võro keele nädäli lõugahus «Kiildke vai är – ma iks kõnõlõ!».
Teedüst ja kavva saa kaia Võro instituudi kodolehe wi.ee päält.
Rahmani Jan
Timahavadsõ võro keele nädäli reklaaminägo ja näüdüsagent Ilvesse Aapo. Rahmani Jani pilt
