Taa nätäl, miä no tulõ, om küländ segäne ja rassõ. Käävä jo paigapäälitside umavalitsuisi valimisõ ja kandidaadi pruuvva meil kõigil pääd segi aia. Mu soovitus om, et ilosa jutu perrä massa-i kedägi valli. Tulõ läbi kaalu, kiä midä tennü om vai tetä saa. Ilosat juttu mõistva pia kõik aia.
Edimäne asi, mink pääle märki, võinu olla tuu, ku pall’o meil ülepää paikligu umavalitsusõga asja om. Tan või egäüts panda aolidsõ piiri, näütüses miilde tulõta, määndsit asjo perämädse nelä aasta joosul umavalitsusõga aetu om vai midä om umavalitsus su elo hääs tennü. Niimuudu saa selges, ku tähtsä tuu umavalitsus inemise jaos ülepää om.
Tõõnõ asi: valli tulõ tutvat inemist. Säänest, kinkalõ saat egäl aol kõlista ja uuri, mille omma as’a tettü niimuudu ja mille ei tetä tõistmuudu. Ma usu, et valijidõ tahtmisõst peris müüdä minnä vällävalitu ei julgu vai vähembält tulõtas tä tuud miilde, ku järgmäne kõrd jäl kandidiir.
Rahmani Jan,
Uma Lehe päätoimõndaja
