Edimäst kõrda peetäs seo sügüse Tarto Ülikooli Lõunõ-Eesti keele- ja kultuuriuurmiisi keskusõ iistvõtmisõl Tal’nan akadeemilist võro keele kursust. Võro kiilt opva Eesti Muusiga- ja Tiatriakadeemiä lavakunstikooli üliopilasõ.
Säitsmele lavakunstikooli tõsõ kursusõ ja katsatõistkümnele neländä kursusõ üliopilasõlõ oppas võro kiilt Tarto Ülikooli lõunõeesti keele ja kultuuri lektri Jüvä Sullõv. Tõsõ kursusõ tudõngidõ võro keele oppus om Lambi Anu lavakõnnõ kursusõ osa, mink ütes opiülesandõs om näütüses Shakespeare’i «Romeo ja Julia» rõdustseeni mängmine võro keelen.
Lavakõnnõ kursusõl opitas pääle võro keele ka tarto kiilt, selle et noorõ näütlejä mängvä muu hulgan Traadi Matsi teossit. Seoilmaaolidsõn kirändüsen om tarto kiilt pruuknu päämädselt Traadi Mats, kink loomingu üts esierälidsembit tunnussit just seo omgi.
«Tudõngi olli väega rahul ja rõõmsa,» ütel’ EMTA lavakunstikooli opikõrraldusõ as’atundja Mooste Angela päält edimäst tunni. Lõunõ-Eesti keele- ja kultuuriuurmiisi keskusõ juhtja Saarõ Eva ütel’ mano: «Lõuna-Eesti keskus om veenü viimätsil aastil akadeemiliidsi lõunõeesti kursuisi ka välläpoolõ Tartot. Nii om näütüses Villändi kultuuriakadeemiän võimalik võro kiilt oppi 2017. aastagast pääle, a edimäne akadeemiline mulgi keele kursus peeti sääl 2020. aastaga sügüse. Et lõunõeesti kiili oppust viilgi laembas tetä, peetäski võro keele kursust Lõuna-Eesti keskusõ abiga 2021. aastaga sügüse Tal’nan Eesti Muusiga- ja Tiatriakadeemiä lavakunstikooli üliopilaisilõ.»
Eesti Muusiga- ja Tiatriakadeemiä lavakunstikooli üliopilaisi võro keele kursust tugõ kultuuriministeeriüm Vana-Võromaa perimüskultuuri tugirahast. Lõunõ-Eesti keele- ja kultuuriuurmiisi keskus om ainumanõ kotus maailman, kon opatas korgharidusõ tasõmõl võro kiilt ja ka tõisi Lõunõ-Eesti põliskiili.
Vokksepä Maarja-Liisa
Tulõvadsõ näütlejä, lavakunstikooli neländä kursusõ tudõngi Mõtsa Maarja, Liive Maria, Salumäe Erik Richard, Ehrenbergi Maria, Käosõ Karel ja näide võro keele oppaja Jüvä Sullõv. Jüvä Sulõvi pilt
