Valmis om saanu Pulga Jaani helütsõõr «Litsmõtsa tango…», kost saa kullõlda katsat umakeelist laulu. Plaadi pääl laulva Pulga Jaan ja Mõttusõ Liivi, laulu om säädnü ja üles võtnu Lunge Toomas.

«Parõmb, ku ma arvassi,» löüd laulumiis Pulga Jaan, ku om vahtsõ plaadi edimäst kõrda läbi kullõlnu. «Lunge Toomas om umma tüüd süämega tennü ja tahtnu nii, et tä olõs kullõldav üle Eesti. Ja mu meelest taa om, eriti noile, kes omma veidikenegi Võrumaaga kokku puttunu.»

Plaadi pääl om katõssa luku, minkast suurõmba jao viie piäs olõma muusikahuviliidsilõ tutva. «Viisi omma kõik seokõrd lainatu. Sõna omma mu tettü, vällä arvatu edimene lugu «Litsmõtsa tango», mis om tettü Ain Kaalepi luuletuse perrä, midä ma kohendi. Es saa jättä säänest ilusat külänimme nigu Litsmõtsa sõnnu sisse pandmada,» seletäs Pulga Jaan.

Lisas Jaanilõ hindäle laul osa laulõ taa plaadi pääl Mõttusõ Liivi. «Tull’ vällä, et mi olõ umavahel kavvõdast sugulasõ,» kõnõlõs Pulga Jaan.

Plaadi pääle omma saanu luu, miä Jaanilõ hindäle omma väega miildünü. Laulnu om tä jo latsõst pääle. «Ma olõ laulnu piaaigu sama pall’u, ku ma viina ei olõ võtnu, tuu tähendäs 65 aastat. Ku vahepääl laulmisõ maha jätse, läts’ tervüs kehväs.Laulmisõ man või olla määnegi vibratsioonivärk, mis toetas organismi. Mõnikõrd üüse lätt uni är, sis aja tsipa jorru, saa parõmb, jää jäl magama.»

Vahtsõ plaadi ümbrisse om kujondanu kunstnik Margna Epp. Plaati saa osta Võro instituudist ja veebipoodist umapuut.ee.

Rahmani Jan

Pulga Jaan hoit umma vahtsõt helütsõõri käen ja tege kavalat näko.