28. joulukuul lätt vallalõ rahva ja eloruumõ ülelugõminõ. Seokõrd võtt statistigaammõt suurõ jao teedüst egäsugumaidsist registriist, a lisas toolõ küstäs umbõs 60 000 inemise käest säändsit küsümüisi, mile vastust registrist kätte ei saa. Üts sääne küsümüs om uma keele mõistmisõ kotsilõ. Võro instituudi direktri Kuuba Rainer kuts võrokõisi üles võro keele mõistmist kirja pandma. Internetiküsümine, kon tuud egäüts tetä saa, om vallalõ kodolehe rahvaloendus.ee pääl 28.12.2021–15.01.2022.
Võro instituudi direktri Kuuba Rainer tege rahvalugõmisõga köüdüssen säändse üleskutsmisõ: «Kümme aastakka tagasi oll’ edimäne kõrd, ku küsti rahva ülelugõmisõl kõigi eestläisi käest, kas nä mõistva ka mõnda paigapäälist põlist kiilt. Mul om perädü hää miil, et sääne asi juhtu, selle et tuu oll’ edimäne kõrd, ku mi tõtõst saimi teedä, ku pall’o om noid inemiisi, kiä ütlese, et nä mõistva võro kiilt. Saimi teedä, ku vana nä omma, kon nä eläse. Tull’ vällä, et noid inemiisi, kiä ütlese, et nä mõistva võro kiilt, om ligi 75 000. Tuu oll’ hää tiidmine, inne toda mi lihtsäle arvssimi midägi.
Ku 2011 rahva ülelugõminõ läbi sai, ellimi tiidmisega, et säänest võimalust inämb ei tulõ. Sis joba üteldi, et järgmädse ülelugõmisõ tetäs puhtani registride perrä. Kah’os teedüst põlidsõ piirkunnakeele mõistmisõ kotsilõ põra ütengi registrin ei olõ, a läts’ nii häste, et statistigaammõt oll’ valmis küsümä mõnõ küsümüse lisas ja üts sääne küsümine om paigapäälidse põlidsõ keele kotsilõ. Küsümise sõnastus om sama, miä oll’ 2011 rahva ülelugõmisõ aigu. Nii om võimalik saia võrrõldava tulõmusõ, mis om sündünü põlitsidõ piirkunnakiili mõistmisõga.
Hädä om tuu, et kõigi inemiisi käest rahvalugõja küsümä ei tulõ. Mineväst kõrrast om suur erinevüs tollõn, et küsütlejä käü õnnõ ütsikide valimihe trehvänüisi inemiisi man. A statistigaammõt om tennü säändse võimalusõ, et kõik inemise saava veebin rahvalugõmisõ lehe pääl kaia tuud teedüst, mis olõman om, ja vastata lisaküsümüisile. Ja ega nüüd ei olõki muud, ku kõik nuu inemise, kiä tundva, et nä mõistva võro kiilt, piässi võtma hindäle süämeas’as minnä 28. joulukuust kooni 15. vahtsõaastakuuni rahvalugõmisõ veebi, et sääl uma paiklidsõ põliskeele mõistminõ kirja panda.»
Rahmani Jan
Võro instituudi direktri Kuuba Rainer soovitas kõigil võrokõisil uma keele mõistminõ rahvalugõmisõ vastamislehe pääl kirja panda. Rahmani Jani pilt
