Seo kuu alostusõn andsõ edimäne võro keele iistkõnõlõja Oti Anneli ammõdi üle Padari Ivarilõ. Et Ivari ammõdiaig trehväs’ joulukuu pääle, otsust’ tä vällä kuuluta kõrraligõ avvohinduga joulusalmõ konkursi.
«Ma esi olõ joba aastit lugõnu jouluvanalõ Ruitlasõ Olavi luulõtust «Arvudi»:
Ostsõ liinast arvudi ma —
vastnõ hewlett-packard
küsüti mis tiit sa taaga
esi sääne kakard
a ei tiiki midägist ma
las ta nukan sais
mullõ lihtsält miildüs timä
kõvaketta hais.
A ütte-samma luulõtust ei taha kõik aig lukõ. Pääleki olõs hää, ku olnu rohkõmb säändsit võrokeelitsit joululuulõtuisi, midä latsõ, a mille mitte ka vanõmba inemise saanu jouluvanalõ lukõ,» seletäs Padari Ivari.
Konkursilõ omma vällä pantu vägevä avvohinna: edimädse kotussõ võitja saa puul tsika, tõõsõ kotussõ võitja koti põrknit ja kolmanda kotussõ avvohinnas om kott kardokit. Päält noidõ om avvohinnafondin võrokeelitsit raamatit Võro instituudilt.
Salmõ saatmisõga konkursilõ om joba kipõ, noid oodõtas ildampa 19. joulukuu hummogu kell 10 meiliaadrõsi annika.teppo@wi.ee pääle. Sis nakkas tüüle hindajidõ kogo, kon omma Kalkuna Mari, Padari Ivari ja Rahmani Jan. Tulõmusõ andas teedä joba 20. joulukuul, pääle tuud kõrraldõdas avvohindu kätteandminõ.
Ligembät teedüst võro keele iistkõnõlõja tegemiisi kotsilõ saa Näoraamadu (FB) lehe päält «Võro keele iistkõnõlõja». Võrokiilse joulusalmi konkursi kotsilõ või täpsempä teedüst küssü Võro instituudist telefoni 782 8750 päält.
UL
