Aastalõpp om suuvmisõ aig. Soovitas häid jõulõ, perän hääd vana aasta lõppu, sis hääd vahtsõt aastat. Nuu soovi omma säändse automaatsõ, inemise väega ei mõtlõgi, midä täpsempä soovitas.
A suuvmisõl või olla ka suurõmb jõud. Egä jõulukuu näüdätäs telekast filmi «Ütsindä koton». Sääl lätt trall käümä päält tuud, ku poiskõnõ om mõtlõmalda soovi esitänü. Või-olla et säändside mõtlõmalda suuvõga pidänü seol suuvmisõ aol tsipa ette kaema.
Suuvmisõl om sis kõgõ inämb jõudu, ku inemine esi otsustas, et niimuudu saa ja lätt. Tuuperäst ma soovi, et mi kõiki soovi olnu timahava tsipa inämb läbi mõtõldu ja mi suuvnu innekõkkõ hindä käest tähtsämbit asjo. Kül nuu soovi sis ka täüde läävä!
Rahmani Jan, Uma Lehe päätoimõndaja
