Kultuuriministeeriüm om kuulutanu timahavadsõ aastaga raamadukogoaastagas. Aasta joosul nõstõtas üles raamadukogodõ tegemiisi ja märgotõdas, kuimuudu raamadukogon elo edesi lätt. Tegemiisin lüü üten 800 raamadukoko üle Eesti. Aasta tetti pidolidsõlt vallalõ 12. vahtsõaastakuul Eesti kõgõ vanõmban rahvaraamadukogon Mulgimaal Tarvastun.
«Seo raamadukogoaasta om jaetu neläs teemas, egäl kvartalil uma teema,» kõnõlõs Võromaa keskraamadukogo direktri Kuljusõ Inga aasta kavast. Edimädsel kolmõl kuul näüdätäs raamadukogosid ku kirändüs- ja kultuurikeskuisi. Sis om plaanin hariligust inämb kiränigega kokkosaamiisi ja lugõmisõga köüdetüt. Võromaa keskraamadukogo iistvõtmisõl om vällä hõigat lugõmisprogramm, kohe om vällä valit 50 romaani, miä kõnõlõsõ lossõst ja mõisist. Noid sis näüdätäs raamadukogodõn, inemise saava noid lukõ ja uma lugõmisõ kirja panda. Kõgõ kõvõmbit lugõjit perän ka kitetäs.
Raamadukogoaasta tõsõ kvartali teema om raamadukogo ku kogokunnakeskus. «Pall’o postkontoriid ja puutõ om är kaonu, inemise käävä sis raamadukokko, kon saa päält aolehti ja raamatidõ lugõmisõ ka arvutiga pangaülekandit tetä, mõnõn paigan om postipunkt kah raamadukogon. Viimätsel aol trükitäs pall’o vällä vaksiinitõendiid. Esiki mõssu saa mõnõn paigan mõskõ, a tuu iist om meid ka pahandõt,» kõnõlõs Kuljusõ Inga. Mõnõl puul om raamadukogost saanu kogokunnakeskus, kon käävä kuun mitmõsugudsõ huvitsõõri.
Aasta kolmanda kvartali teema om: raamadukogo tsõõrõ pääl. Sis läävä pall’o raamadukogo umist tarrist vällä. «Meil om plaanin vällä tulla 19. põimukuul kirändüsuulidsa festivalilõ, midä plaanitas pitä Võrol Katariina uulitsan. Piämi sääl sünnüpäivä, kitämi lugõmisprogrammist ossavõtjit,» seletäs Kuljusõ Inga.
Aasta neläs teema om tulõvigu raamadukogo. Tuust plaanitas mi kandin märgota joba süküskuu alostusõn, ku Rõugõ rahvamajan tetäs Kagu-Eesti raamadukogondusõ päiv. Tuu päiv om plaanit lõpõta arotusõga raamadukogo tulõvast aost. Kuljusõ Inga om kimmäs, et raamadukogo jääse viil hulgas aos tüüle. «Ku telekas tull’, arvati, et kino kaosõ är, a es kao. Ka sis, ku e-raamadu tulli, arvati, et naatas õnnõ noid lugõma, a es naata. Raamadukogo iks jääs!»
Kuljusõ Inga sõnno perrä om Võrol perämädsel aol kasunu raamadukapi kaudu raamatidõ teljide arv. Kapp tüütäs nigu pakiautomaat: inemise saava sinnä raamadu telli ja tuu säält kätte ka sis, ku raamadukogo om kinni.
Rahmani Jan
Võromaa keskraamadukogo direktri Kuljusõ Inga. Rahmani Jani pilt
