Vällä om märgit lavvamäng, mink tegemise käävä suidsusannan ja sanna ümbre. Mängu edimäne prototüüp om valmis, no proovitas taad võimaligult pall’odõ inemiisiga läbi mängi ja praavita. Ku häste lätt, saa mäng aasta peräst peris valmis.
«Sääne mäng om viil pruukmalda viis UNESCO kultuuriperändüse nimekirja kantu mikandi sannaperändüse näütämises,» seletäs mängu tegemise iistvidäjä Piiri Helen.
Mõtõ sääne mäng tetä om peri minevä aasta urbõkuul olnu «Vunki mano!» mõttõtalossilt. «Mõttõ autor om Laanõ Triinu. Saimi mõttõtalossil tüügrupi kokko ja naksimi märgotama, mille, kuis ja kelle jaos taad tetä. Arotimi, et raamat om suidsusanna kotsilõ tettü, «Suidsusannasümfooniat» om mängitü, om tettü ka turunduskampaanjit, a viil ei olõ säänest mängu, miä opanu kombit ja olnu ka hää viis, kuis noid latsilõ opada ja meelütä vanõmbit latsilõ kõnõlõma, mis tuu suidsusann om,» seletäs Piiri Helen.
Timä sõnno perrä om säänest mängu, midä ilman viil tettü ei olõ, peris rassõ vällä märki. «Tan omma tegeläse ja tõistmuudu mängukõrra ja jukõrusõkaardi viil vahepääl, taa kõik võtt aigu,» seletäs tä. Edimädse kujondusõ om mängulõ tennü kunstnik Oolbergi Taavi. «Kah’os ei olõ täl aigu mi mänguga jakada, nii et otsimi mängulõ ka vahtsõt kunstnikku. A inne tuud teemi kooni lehekuuni parhilladsõ variandsi läbimängmist, et mängu parõmbas tetä.»
Helen om mängu joba ummi tutvidõ ja näütüses ka keelepesärühmi latsiaiaoppajidõga läbi mängnü. Et läbimängjide hulk olnu suurõmb, pruuv tä ka vahtsit huviliidsi löüdä. «Näoraamatun (FB) om leht «Suitsusauna lauamäng». Tuu kaudu saa mukka ühendüst võtta ja sääl om ka kirjapandmisleht, mink täütjidega saami ao kokko leppü ja mängu läbi mängi,» seletäs tä. Ühendüst või Heleniga võtta ka meiliga helen.piir99@gmail.com.
Veriora kandist peri Piiri Helen opp Villändi kultuuriakadeemiän kultuurikõrraldust. Tä ütles, et om suur sannasõbõr ja tuuperäst om ka säändse lavvamängu tegemine timä jaos põnnõv.
Rahmani Jan
Suidsusanna lavvamängu tegemise vidäjä Piiri Helen mängu edimädse prototüübiga. Rahmani Jani pilt
Kuimuudu suidsusanna-lavvamäng käü?
Mängu tsiht om kor’ada võimaligult hulga punktõ, võit kõgõ suurõmbidõ punktõga mängjä.
Lavvamäng sais kuun mängulavvast, tegeläisi kaartõst, punktikaartõst ja jokkõrikaartõst. Mängulavva pääl omma mitmõ suidsusannaga köüdedü ruumi: moro, sanna ederuum, sannaruum. Mängu alostusõn tõmbas egä mängjä hindäle tegeläsekaardi ja saa teedä, kiä tä mängu joosul om ja määndsit punktikaartõ korjama piät. Mängu alostas kõgõ vanõmb inemine, selle et vanalinemisel om külm ja tä taht kipõstõ sanna saia.
Mängjä nakkasõ kõrrast hindä ette käümä kaartõ, miä kujotasõ sannategemiisi. Näütüses lava pääl visatas kopaga lõunõt, mõsuruumin mõstas hinnäst, ederuumin aetas juttu ja välän käüdäs tsuklõman. Mängun omma ka jokkõrikaardi, miä muutva mängu saisu ja ajava kõik tegeläse sannast vällä. Näütüses üts «Sannast vällä!» kaart om sõnomiga, et kiäki vansõ sannan, sannavana pahasi är ja sann läts’ karmu täüs. Mäng käü nikani, ku kaardi omma otsan vai ütelgi mängjäl ei olõ võimalik inämb kaartõ vällä kävvü.
