Nimme Kahr kand parhilla Eestin 86 inemist. Nimel Kahro om kandjit rohkõmb – 145. Algusõn sama tähendüsega om viil nimi Kahre – 96 kandjat. Kõik nime pandmisõ es pruugi tähendä kahru, selle et ka nimme Kaar (210 kandjat) võidi saksa muudu kirota Kahr, a uurminõ näüdäs järgmäst:
Taheva mõisan panti Kahr kujul Kachr. Niimuudu sai kirota õnnõ välläütlemisen h-ga sõnna, a et Tahevan om kotus Kaaramõisa, sõs om iks loogilinõ, et vanõmb lisanimi *Kaar om kahru tähendüse pääle ümbre tõlgõndõt.
Vana-Kasaritsa mõisan sai priinime Kahr Sika Kahru Jakapi läsk ja poig Jakap. Haani mõisan sai nime terve suurpere Kokõmäel: Kahru Jaani Jakap, Kahru Jaani Ann ja Annõ poig Peep, Kahru Jaani Piitre Jaan ja Jakap ja tõsõ. Ka Kahru külä nimi om tuu suguvõsa perrä saad ja priinimega kuunkõlan.
Saalussõ nimi Kachr kuuli usutavastõ vällä. Otõmpää kihlkunna Vidrike Kachr > Kahr om külh alalõ püsünü.
Üts kotus, kon sõnna kahr ei tunda, a nimme Kahr om paar kõrda kirutõt, om Suurõ-Jaani Olustvere mõisa. Tääksi külän oll’ Karu (Karro) talu, a nimi, mis sääl hingelugõmistõ panti, oll Kaehr ja tuu seoilmaaignõ perrätulõja päämidselt Kähr. Sääl ei olõki nime alussõs kumbki eläjänimetüs, a saksa muudu edenime Gerhard määnegi mugandus, võta sõs kinni, kas *Käär vai *Kaar.
Nimi Kahro vai parhilla eriti harv Kahru panti katsan mõisan. Neo olli Otõmpää ja Otõmpää kerigumõisa, Uderna mõisa Rõngun, Tõlliste mõisa Sangastõn ja Hummuli mõisa Helmen. Võrumaal Lannamõtsa mõisa Harglõn, Kärgula mõisa Urvastõn ja Põlva Kähri mõisa Tännässilmä külän. Näütüses Kärgulan oll’ nime alussõs Kahru talu nimi, seoilmaaigu Kahro külä, 1684 Karro Jahn, 1716 Kahro Jaan.
Põlva Kähri mõisa Karilatsi külän panti Tännässilmäst vähä tõistmuudu nimi Kahre. Kahre omgi õnnõ sääl tegünü. Tammoja Kaisa om kaenu, et tuu sai vele Kahru Märt ja Andres ni sulanõ Mihkli. Kahru talu omma Karilatsi jõõ veeren, Tõdult sisse minnä, muusõumi puult Kassimõtsa takan.
Ku 1921. aastal Setomaal perekunnanimmi võeti, võtt’ üts perekund Irboska vallan Kahr ja tõnõ Petseri vallan Kahro. Eestistämise aigu omma Vestersteini Otõmpääl võtnu vahtsõs nimes Kahru. Kahre nime kandja jälleki omma võtnu vahtsõt nimme Kaare.
Parhilla om nime Kahr kandjit kõgõ rohkõmb Valga maakunnan, päämidselt tenu Taheva Kahrõlõ. Kahro niisama, tenu Otõmpää kandi Kahro-nime kandjilõ. Kahre om muiduki kõgõ levinümb Põlva maakunnan.
Saarõ Evar
Rubriigin kõnõldas perekunnanimmi periolõmisõst ja tähendüsest.
