Laulimi käest kinni hoitõn. Närviirsemi, kuis Rüütlil Moskvan lätt. Teimi püksirihma vahtsiid mulkõ ja tennässimi õnnõ, et kartlikoorõ omma iks viil tsiasüük. Noidõ koortõ süümises oll’ meil vaim valmis, a periselt vaia es lähä.
Tassakõistõ läts’ elu parembas. Sis äkki tull’ suur hiitümine. Kuulutõdi maha, et nüüd om tarbimispidu otsan ja tulõ naada kokkuhoitlikult elämä. Kunas tuu pidu alas’ vai kelle laua ümbre, tuud Lõuna-Eesti rahvalõ es üldä.
Tull’ kroon ja suur vaimustus. Varsti ütel’ krooni tuuja: meil tulõ kroon minemä visada ja euro asõmõlõ võtta. Muidu vällämaa ärimehe ei mõistõv rahadõga rehkendä. Tuu jutt oll’ joba pall’u imelik: meil jäi mitusada kolhoosi pääraamadupidäjät tüüldä, olõs võinu noid palgada.
Sis käve viil kõva vaielus, kas leeväpäts tohes massa üle krooni, ku kilu rüäjahu mass alla krooni ja tuust saat vähämbält kats pätsi. Tulõmus läts’ poolõs: ütele poolõ võit, tõsõlõ õigus.
Sis mäletä ma viil tollõaigsõ pääministri virilät näku, ku mõni suurõmb rahasumma ähvärd’ maameeste kätte minnä. Läbi sihemise valu sai miis ainult pomisõda: lennukiide päält raha külvmine.
Hillä-tassa naati kõnõlõma, et suveräänsust om saanu ülearu pall’u, et osa tulõ är anda. Põhjendus oll’ alati üts: muidu tulõ Vinnemaa kallalõ. Vinnemaal muiduki oll’ ummigi häti viländ pall’u. Terve kamp parlamendisaadikiid tahtsõva Gorbatšovi kohtu alla anda ja mõni ütel’ esiki kohtuotsusõ vällä: üles puua! Vinnemaa kolliga ullitõdas meid siiämaani ja uskjiid lövvüs. Edimält oll’ Vinnemaa halv selle, et sääl oll’ Stalin. Perän selle, et sääl oll’ kommunism. Lõpus oll’ hädä tollõn, et om Putin, kelle äräminek ollõv poolõ pääl. Näüs, kiä meid nüüd kollitama nakkas. Kiäki ei olõ tullu mõttõ pääle, et äkki om hädä hindä man.
Jah, häti om ollu viil pall’u, aga põrõlt om päämine murõ: kuimuudu nahk toorõs hoita, ku puul pensioni lätt elektriarvõ masmises ja poodin tulõ söögikraami iist järjest suurõmbiid rahasiid vällä kävvü.
Asja võtt kokku üte mii poliitiku nõukaaigu üteld lausõ: «Sääne asi või lõppõda lehmäpidämisega!»
Pulga Jaan.
Rahmani Jani pilt
