Ku usku kõkkõ, mis kunagi kirja pantu, sõs piässi uskma ka Vana-Rooma legendi, et Rooma liina asut’ Romulus õkva 21. mahlakuul 753 inne Krõstust (iKr) ehk täämbä 2775 aastakka tagasi. Täpsä aastaga rehkend’ vällä opõtlanõ Marcus Terentius Varro (116–27 iKr) ja tuud pruugiti Rooma riigi aoarvamisõ alussõs. Liina vällä rehkendedü ja kokku lepitü asutamisõga alust’ aastak 1. Kuupäiv tulõ kiräsõnast: «üteltõistkümnendäl pääväl inne mai kalente (lehekuu algust)». Tegeligult muiduki om Rooma liin tegünü aigupiten ja mitman jakun, nigu iks väega vana liina.
Eesti priinimega Rooma (72 kandjat) om lugu hulga lihtsämb. Võnnu kihlkunna Ahja mõisan sai tuu nime vanan kiräviien kujul Roma peris suur suguvõsa. Rooma Jakapi poig, Rooma Miku poja ja Rooma Rämmäli poja ellivä Aksten, Läänssil (Lääniste) ja Ibasten – kõik nä olli peri Ibaste külä Rooma talust. Ibasten om tuud nimme edimäst kõrda mainit 1721. aastaga revisjonin: Roma Bertell ja Roma Hans. Rootsmäe Lemming om kirja pandnu rahvaperimüse, et Roomadõ esiesä ollõv Ahja mõisadõ tuud Pärnumaalt, vahetõt jahipinne vasta. Ja et nimi tulõ edenimest Roomo vai Roomu, miä om lühembäs jäänü germaani nimi Fromhold.
Nii või tuu olla külh. Huvi peräst või nimmada, et arvada Fromholdist om saad ka paigapääline, Võnnu ja Räpinä edenimi Rämmäl. Nii et Rooma Rämmäli lisanimi ja edenimi olliva samma peritollu.
Ka Kurista mõisan oll’ Teriketsi külän Rooma talu ja nii panti säälgi priinimi Roma – Rooma Jaani perrele. Et Teriketsi Rooma talunimi om noorõmb ku Ibasten, om tuu lisanimi vast Ibastest sinnä lännü.
Kolmas kotus, kon priinimi Rooma tegüsi, oll’ Urvastõ kihlkunna Annõmõisa Mälle talu. Mille Mälle Juhani poigõlõ Roma nimes anti, olõ-i selge. Tuu või tulla liinanimest Rooma vai sõs puuroomakõsõ (mõtsatüülise) nimetüsest. Õnnõ hobõsõriistu osa nimetüs olõ-i võimalik, selle et Urvastõn omma taossidõ külen paksust nahast tettü rahkõ, mitte rooma nigu Põh’a-Eestin ja esiki Lõuna-Tartumaal.
Priinimme Room, minkal om 28 kandjat, om pantu mitmal puul üle Eesti ja tuu või tulla külh nii hobõsõriistu osa nimest ku ka Rooma liina nimest. Om jo liina nimi saksa keelengi Rom [room].
Tartu iätüsemeistre Rooma Evald, kuulsa Eskimo-unu, oll’ peri Ahja mõisa suguvõsast. Tuu omgi kõgõ suurõmb Rooma suguvõsa.
Saarõ Evar
Rubriigin kõnõldas perekunnanimmi periolõmisõst ja tähendüsest.
