6. lehekuul kell 13 asotõdas Tarton Eesti Kirändüsmuusõumin Kaplinski Jaani selts.
Kiränik Kaplinski Jaan (22.01.1941–08.08.2021) oll’ ja om maailma mõõtu luulõtaja ja mõtlõja. Tä kirot’ uma elo joosul päält 60 raamadu Eestin ja tõist sama pall’o vällämaal. Timä loomingut om pant vähämbält 30 kiilde, tä om saanu hulga avvohindu, noidõ siän Euruupa kirändüsavvohinna elotüü iist. Tedä om mito kõrda esitet Nobeli kirändüspreemiä kandidaadis. Kaplinski luulõ ja mõttõlooming om tunnõt ja hinnat mitte ütsindä Eestin, a ka Soomõn, Skandinaavian ja muial. Luulõtuisi ja juttõ om Kaplinski kirotanu ja avaldanu ka võro keelen.
Tuuperäst om rühm Kaplinski Jaani lähküidsi inemiisi ja sõpru otsustanu luvva Kaplinski seldsi, miä köüt ütte inemiisi ja asotuisi, kink jaos timä kiräsõna om tähtsä ja kiä tahtva, et tuust saanu ossa võimaligult pall’o nii täämbä ku tulõvigun.
Selts plaan üten lüvvä kultuuriprojekten, küssü fondõst ja annõtajidõ käest tukõ stipendiummõ, preemjide ja uurmistöie jaos ni konvõrentse ja kultuuriüritüisi kõrraldamisõs, miä avitasõ vallalõ märki ja edesi arõnda Kaplinski perändüst. Seldsi ellokutsjidõ suuv om, et Kaplinski luulõtuisi ja juttõ kõrval jõudnu laemba avalikkusõ ette ka timä filosoofilidsõmbat laadi mõttõ. Nuu andva ainõst edesi märgota keelest ja kultuurist, inemisest ja Jumalast, inemisest ja luudusõst, tehisintellekti ja inemise vaimu vaihõkõrrast, Hummogu ja Õdagu mõotamiisist ja pall’odõst tõisist asjost, mink peräst Kaplinski Jaan süänd valut’ ja minkast mõtõl’ ja kirot’.
Kõiki, kiä omma toda miilt, et Kaplinski Jaani looming om tähtsä, ja tahtva plaanituidõ tegemiisi man üten avita, oodõtas seldsi luumisõ mano. Huvilidsõ saava hinnäst kirja panda ja muud teedüst internetiaadrõsi jaankaplinski.eu päält.
UL
