Mamastõ külä miis Kaha Kaido om kokko säändü raamadu «Ütekõrra om katõkõrra», kost löüd võrokeelitsit juttõ juhtumiisist, miä omma sündünü Põlva kandin päämidselt kolhoosiaol. Raamatulõ kokko kor’adu luu omma suurõlt jaolt peri miihi maailmast, juhtunu näütüses tüükua man vai autoroolin. Puulpäävä, 28. lehekuul peeti Põlva raamadukogon vahtsõ raamadu võimas kaejatsipido.
Kaha Kaido om saekaatrimiis, kiä mäng pilli ja pidä pulmaesäammõtit. Et koroonaaol oll’ pillimängmist ja pidojuhtmist veidemb, naas’ tä Näovihu (FB) võro keele gruppi juttõ kirotama. Jutu miildü lugõjilõ. Nii tull’ mõtõ näist raamat kokko säädi.
«Tüü man naksi mobiili märksõnno kirotama, õdagu lätsi kodo, kiroti luu valmis. Ütel pääväl saiva hindä luu otsa, õigõmbalõ sai arvo, et naa kõik ei olõ inämb mu luu, olõ näid kellegi käest kuulnu. Sis naksigi sõpro pite käümä vai sõbra tulliva mullõ küllä, kõnõlimi lugusid ja ma võti nuu linti. Mõnõl oll’ juttõ kolmõ tunni jago, selle et näütüses autobaasin juhtu egä päiv midägi,» seletäs Kaha Kaido.
Raamatulõ saiva jutu tegemiisist, midä om hää ette kujota. Üleskirotaja esi pandsõ kah egäle jutulõ ütte-tõist mano.
Raamat om võrokeeline. «Mul oll’ latsõna inne võro kiil, perän sunniti eesti kiilt opma,» kõnõlõs Kaido umast latsõpõlvõkeelest. «Imä tüüt’ EPAn, hummogu läts’ ja õdagu tull’, terve päiv hoitsõ minno vanaimä. Tä oll’ Kähri küläst peri, 1940. aastagal Mamastõlõ tulnu. Mul om Kähri külä ja Mamastõ külä segonõnu kiil,» seletäs Kaha Kaido.
Raamadu kaejatsipido aos oll’ Põlva raamadukogo mano tuudu hulga vinneaoliidsi massinit. Üles asti ka kuulsa Põlva kandi lõõdsamehe, pidol kõlasi laulu «Vana sann», «Tulõ aga tulõ», «Kats kitsõ» jt. Katõ raamatulõ saanu jutu perrä olli kaejatsidõ aos tettü ka videoklipi, midä rahva rõõmus ette mängiti. Noid videoklippe saa kaia Youtube’ist Kaha Kaido kanali päält.
Rahmani Jan
Raamadu «Ütekõrra om katõkõrra» kaejatsipido Põlva raamadukogon. Mängvä tunnõdu lõõtsamehe, autor sais takan. Rahmani Jani pilt
Kaejatsipido aos oll’ vällä tuudu hulga vinneaoliidsi massinit. Rahmani Jani pilt
