Perimüstandsu festival Võrol 7.–10. hainakuul tulõ seokõrd päälkirä all «Vana moodu perrä». Tuu tähendäs, et pido tandsuettevõtmisõ omma köüdedü tandsõga, midä tandsiti sada aastakka tagasi.

Festivali pääkõrraldaja Musta Tiia ütles, et ülesherätämist vana tandsu esiki ei ooda. Perimüstandsu omma joba küländ populaarsõ ja hulk rahvast käü näid tandsman tandsuklubidõn üle Eesti. Seokõrdsõ festivaliga tahetas lihtsäle näüdädä, et väärtüsliidsi asju väärtüs ao joosul ei häö.

Umakultuuri avvostajalõ lövvüs kavan muudki huvvipakvat. Näütüses saa puulpäävä hummogu Vana-Võromaa kultuurikuan hinnäst võrokõsõ muudu rõivilõ säädi. Võro kiilt kuuld pido aigu kah: neläpäävä nakkas festival Koreli pargin pääle lavakavaga «Tan om tuu lump», kon muusikat tege Tauli Anu ja vahelõ kõnõlasõ Jansonsi Silvi ja Käosõ Maive. Puulpäävä mäng Tal’na võrokõisi selts Kandlõn Kauksi Ülle näütemängu «Kolm hinnapakmist».

Aig tege kõgõ pido kõrraldusõn muudatuisi, tuuperäst soovitas Musta Tiia kaia innekõkkõ kavva, miä üleväl festivali kodolehe pääl. «Minevä aasta oll’ koroona, timahava mõotas mi pito sõda. Vällämaa külälidse, kiä edimält tahtsõ tulla, omma perrä mõtõlnu ja nüüd tulõkist är ütelnü. Nä löüdvä, et tan ei olõ oholda,» kõnõlõs tä pall’odõ küläliidsi kõrvalõjäämisest.

Festivali traditsioonõ hoita seo siski ei sekä: tulõva uulidsatands ja tandsuorientiirümine, tandsutarõ ja tandsuetendüs Teppo talon, laat ja Teppo lõõdsa võikimängmine. Ka kuuld seokõrd festivalil pall’o hääd muusikat. «Ja kül jõud mi mano iks mõni vällämaa rühm kah,» lupa pääkõrraldaja.

Kabuna Kaile

Perimüstandsu festival om aastit Võro liina tandsuga täütnü. Sissasõ Lasse Rihardi pilt