Ku ma taad periselt elon juhtunut luku tõisilõ kõnõlõ, sõs kõik naardva, a mul hindäl ei tulõ külh pääle surmahirmo üttegi muud mõtõt päähä.
Mi klassil oll’ kokkotulõk ja ku varra hummogu puul kuus viimätse pidolidsõ liina sõidutimi, mõtlimi mehega, et magama no inämp ei lää, läämi siinde. Sõitsõmi Tinnipallo, kon ollimi ka varõmp pall’o kõrdu käünü. Miis pand’ minno mõtsa maaha, esi sõitsõ kõrras sõsara poolõ, kiä eläs sääl lähkün.
Ma kõndsõ ja kõndsõ tsihti piten, siini oll’ katõl puul tiid mõni ütsik. Sai sõs mõnõ varrõ kurõkatlit, miä mullõ väega miildüse. Käändse otsa ümbre, et nakka tagasi kõndma, a ruusatiid es tulõ ega tulõ.
Sõs kai, et elektriliin lätt õkva, tuu piäs õks kohegi vällä jõudma. A pia tull’ perv, midä piten tull’ tagaotsa pääl alla libistä. Jõudsõ Võhandu jõõ niidü pääle, kon korgõ poku ja muda. Rähkli sõs pokudõ vaihõl ja egä sammu aigu jäi kalosk mua sisse kinni. Vaivalidsõlt küünüten sai kaloski kätte, a järgmädse sammuga oll’ tõõnõ kalosk kinni.
Süä klopsõ rinnun ja veri vuhisi pään. Nõgõsõ kah viil kõrvõti käevarsi. Mõtli, et siiä ma jää, jõud oll’ nii otsakõrran. Istsõ üte poku otsa ja naksi uikma, et vast kiäki kuuld. Rüüki õks viil jõudsõ.
Tõõsõlõ poolõ jõkõ ilmu üts miis ja ütel’, et tan om purrõ. Nuu olli kats nilbõt musta palki vii all. Tuud purrõt piten es julgu kül minnä. Rähkli sõs jõõ luukit piten ja pokudõ vaihõl edesi järgmädse taloni. Sääl olti mu uikmist kuultu. Talo peremiis ja pernaanõ olli uma poolõ pääl. Ma sõs sulpsi vette ja vesi oll keskkihäni. A tõõsõl puul jõkõ es olõ üttegi purrõt ega treppi, õnnõgi õgva perv üles.
Perrerahvas vinnäs sõs minno kässipiten muatsõst pervest üles. Istõ näide sanna ette nigu õnnõtusõunik. Es olõ mobiiltelehvonnõ, et helistä, nii sõitsõ peremiis mõtsa tiiristi pääle, kon mu tõõnõpuul oll’ minno jo üle tunni ao uutnu ja otsnu.
Kilekoti panti autoistmõ pääle ja sõit läts’ kodo poolõ. Ei siini, ei lilli! Hää, et haigõs es jää. Aiteh Jukulõ naasõga abi iist hulga aastidõ taadõ!
A nüüd, ku kongi pokusid näe, ütle mõttin: «Kuradi poku!»
Visnapuu Irma
Reimanni Hildegardi tsehkendüs
