Moosten peeti 15.–16. hainakuu pääväl 23. kõrda folgifestivali Mooste Elohelü. Katõ päävä joosul jõudsõ lava pääle hulga esisugutsid lauljid ni pillimängjid. Õdagist oll’ Mooste pääl pidolinõ ja ilolinõ olõminõ ni kostu esieränis ehtsält energilist jämmi.

Võinu üteldä, et Mooste Elohelü ei olõki mõtõld suuri rahvamassõ jaos, a om rohkõmb gurmaanõ ja muusikidõ kokkosaamisõ kotus ja hää võimalus, kon hindä luudut maailmalõ näüdätä. Moostele om umanõ, et pido luu hinnäst esi, pillimehe mängvä egä minot kongi pilli ja tandsuhuvilidsõ tandsva. Mooste Elohelü võikimängmiskontsõrt om tuu, miä tege läbielämise hoobis esierälidses.

Seol aastagal oll’ võistluslukõ pia egän muusigastiilin. Pääpreemiä kodo viinü 6hunesseq oll’ andnu umalõ luulõ piinütundõlidsõ ja pühäligu kõla. Hoobis tõnõ terä oll’ The Thomahawck Brothersi esitus: nä olliva uma luu säädnü puhkpilliorkestri esitüste ja krehvtitänü tuud kõkkõ absurdsõ koomilisusõga. Duo Viik paistu silmä tuu poolõst, et kohustuslikku võigõlusluku esitivä nä tävveste instrumentaalselt. Meisterligult pruugiti kõiki lauluviie kihte ja esieräsüisi, miä tõi näile ka kõgõ parõmba säädmise preemiä. Kohustuslikku tsõõrilaulu sai kuulda nii haldjafolgilidsõn võtmõn (ansambli Cs’), keldiligõ mõotuisiga ansambli O`Reel säädmisen ku ka näütüses viie toropilli võimsan kuuntüün, midä paki Cätlin Mägi ja timä TÜ VKA toropilliopilasõ, kiä saiva tunnustust Eesti Rahvaluulõ Arhiivilt. Värskit väke täüs esitüse iist sai Trad Kvintessents nuuripreemiä.

Lõunaeestläse jaos lei pidol kodotunnõt suur hulk paiklikku muusikat ja umma kiilt. Võro kiilt kuuldu mitmõ päävä joosul nii lavalaudu pääl etteastjidõ suust ku ka egäpäävätsin jutuajamiisin. Võromaist vunki paksõ Wana Wõromaa Wunkorkestri ja ehtsämbät regilaulu kanni ette Liinatsuraq. Võromaidsit muusikit oll’ viil tõisigi. Kullõlda sai ka võrokeelitside koorilaulõ esitlüst.

Mooste Elohelü ei lüü suuri rahvamassõ ja kommõrtsligu kavaga. Pidol loova olõmisõ illo kodotunnõ, tegijide päälenakkaminõ ja tegemisrõõm. Programm oll’ ehtsä (lõuna)eestimainõ ja täüs üllätüisi.

Kõik, kiä tundva, et teedä-tunnõtuil folgifestivalõl om ülearvo pall’o rahvast, võinu järgmädsel aastagal säädi sammu Mooste poolõ.

Lauga Getter,
Vahtsõliina juuriga kandlõmängjä

Moostõ folgi võtsõ häste kokko ütelus «Normi piireh folki, rokki ja alekokki». The Thomahawck Brothers lava pääl. Maseni Kristina pilt.