Mõnistõ ja Karilatsi muusõumi võro keele laagrilõ hainakuul tull’ kirriv seltskund latsi: mitmõlt puult Vanalt Võromaalt, a ka Tal’nast, Tartost ja juuri pite esiki Hiinamaalt.
Mõnistõ muusõumi laagrilatsõ saiva üümajja rahvamajan. Latsiga kammandi Mannasõ Külli ja Pazuhanitši Asta. Laagriliidsilõ pakuti nii kässi vaihõl tegemiisi – lastu pääle maalminõ, savist eläjide vuulminõ, kõotohost nikõrdaminõ, kedervarrõ pruukminõ – ku ka ümbrekunnan roitmist. Üts välläsõit vei Valgamaalõ Mäekalle tallo (OÜ Elukutsar) hobõsit, eeslid ja ponisid kaema ja tõnõ Alaveski eläjäparki, kon kõgõ inämb tähelepanno sai nõglatsiga ummi poigõga.
Õdagu sai tulõ ümbre istu, laulda ja tandsi. Üts küläline käve Mõnistõn tulõõdagul kah: Palo Timo ummi põnõvidõ juttõga käügest maakerä põh’a- ja lõunapoolusõ pääle.
Karilatsin saiva laagrilatsõ kolmõ päävä seen kivi pääle maali, vibuga laskõ, perimüsliidsi mängõ mängi, matkatarkuisi oppi, laulda ja muidoki ümbrekunnan ringi kävvü: Merioone lätte man ja Tilleoron. Tulõõdagu üllätüsküläline oll’ Contra, üten muidoki luulõria. Laagriello kõrraldi Asuri Diana ja Langi Tiina.
Võro keele laagri om mõtõld latsi ja nuuri nii-üteldä keele sisse tsuskamisõs, keelega tutvas tegemises. Säänest laagrit om Võro instituudi iistvõtmisõl kõrraldõt joba paarkümmend aastakka.
UL
Margna Epu (häädkätt) kunstitunn Katrilatsi võro keele laagrin.
