Minevä neläpäävä sai Mooste Folgikuan kuulda esierälist kontsõrti: ette kanti muusikat, midä plaanitas tarvita tulõva aasta suvõl etendüse «Rongirüüv» man. Tego om võrokeelitside laulõga, mink sõna om kirotanu Ilvesse Aapo ja muusiga tennü Meistri Erki.

Folgikuan astsõ üles ansambli, kon olli säändse pilli: klarnet, saksofon, trompet, tromboon, viiol, kitarr, basskitarr ja trummi. Mitmõ helü pääl laulõ laulsõ vokaalansambli Miinus Seitse. Muusikit ja lauljit dirigiirse Aimla Siim. Kontsõrdil kanti ette ütessä vahtsõt laulu, noist katõssa võrokeelist ja üts, miilitside laul, vinne-eesti-võro segäkeelen.

Laulu võeti linti ja noid plaanitas tarvita tulõva suvõ etendüsel «Rongirüüv», miä kõnõlõs mõtsavelli elost ja rassõl aol inemises jäämisest. Näütemäng om saanu toukõ periselt Võromaal sündünüst juhtumisõst, ku väiku hulk mõtsavelli raharongi är võti.

Näütemängu om Ilvesse Aapo idee perrä kirja pandnu Rahmani Jan. Etendüsen plaanitas tarvita hulga Meistri Erki kirotõdut muusikat. Kõik tuu sääd lava pääle Tootsi Kristo.

UL

Üles astnu pillimehe ja laulja üten dirigendi Aimla Siimu, viieluuja Meistri Erki ja mõisaherrä Needo Üloga, kiä lugi laulõ vahelõ ette tükükeisi näütemängust. Paalese Ellu pilt