Kõik taa pudrutaminõ, targutaminõ ja põhjõndaminõ, mille energiä hind äkki nii kallis om lännü, pandsõ minno mõtlõma mitmõn tsihin. Naksi märkmä, kuis innemb oll’, kuis nüüt om ja kohe mi edesi liigumi.
Ildaaigu märgoti ummi latsõpõlvõpilte pääle, ku mul koton elektrit es olõki. Edimädse klassi koolitunnõ sai tettüs tattnõna valgõl, a tuugipoolõst saiva kõik tähe selges. Ka maja oll’ lämmi. Ahun palutõdi haku ja peenükeisi puid ja nii eleti väega häste är.
Ma ei taha üteldä, et mi piät sinnä aigu tagasi minemä. A tullõn täämbäste päivä, sis om selge, et olõmi muutunu iks väega abitus. Vahtsõ maja olõmi ehitänü nigu kummikoti: nuu läävä õdagu, ku päiv är lätt, külmäs ja hummogu, ku päiv vällä tulõ, lämmäs. Sis piämi noid kütmä ja jahutama. Ahokütmist ei kaia hää pilguga: tuu tsolkvat luudust. Nii olõmi väega suurõ nõiaringi alostusõn.
Ku midägi piäs juhtuma tuu traadiga, miä kibõna majja tuu, sis tulõ tävvelik kaos: ümbretsõõri om pümme, külm, poodi ja muu tarvilinõ ei tüütä. Julgu vällä üteldä, et väega pall’o ütiskunna hädä omma köüdedü tuuga, et elo om liiga hääs lännü. Mi olõmi muutunu liiga mugavas ja mi pääst om är võetu maamehe loomulik elämise tarkus vai kergüs. Ja om hulga säändsit töid, midä mi esi inämb tetä ei taha, otsimi noidõ jaos tegijit vaesõmbilt mailt.
A tõsõlt
puult omma ka võimumehe olnu pikkä aigu säläga rahva poolõ. Parhillatsõl aol, ku ei olõ selge, midä hummõninõ päiv tuu, pidänü nä näo käändmä inämb inemiisi ja ettevõtjidõ poolõ. Ettevõtja ja rahvas omma neo, kink olgõ pääl saisva riik ja majandus.
Ettevõtjana tiiä, et mi egä päiv mõtlõmi, kuis hoita noid inemiisi, kiä mi man tüütäse, ja kuis näile palka massa. Ettevõtja piät saama toimõ tuu rahaga, midä timä ettevõtminõ sisse tuu. A ku tuust rahast võtt väega suurõ osa är energiä, midä ettevõtmisõ man kulus, sis või mõnõlgi rassõs minnä. Täämbä om pall’odõl ettevõtjil hulga küsümärke, midä iin uutva süküs ja talv toova.
Karm luudussäädüs om sääne, et ello jääse tugõvamba, targõmba ja nutikamba. Nuu, kiä esi ei pelgä kah tüüd tetä.
Pindmaa Aigar
Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.
